މާފަންނޫގެ ބައެއް ދާއިރާތަކުގައި ކެމްޕޭނަށް ދޮރުން ދޮރަށް ހިންގެވުމަށްފަހު ނޫސްވެރިންނާއި ބައްދަލު ކުރައްވާ ރައީސް ސޯލިހު ވިދާޅުވީ ދުވަސްވީ މީހުންގެ އެލަވަންސަށް ގެންނަ ބަދަލަކީ އިންތިހާބުގެ ދެވަނަ ބުރަށް ކުރައްވަ ކަމެއް ނޫން ކަމަށެވެ. އެއީ ސަރުކާރުން ކުރިން ވެސް ކުރަން ރާވަމުން ދިޔަ ކަމެއް ކަމަށާއި އެކަން ކުރިން އައްޑޫސިޓީގައި އިއުލާން ކުރައްވާފައިވާނެ ކަމަށް ވެސް ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ އެލަވަންސަށް ގެންނެވި އިސްލާހު މީހުން ބަލައިގެންފައިވާ ކަމަށާއި ރަނގަޅު "ރެސްޕޮންސްތަކެއް" ލިބެމުންދާ ކަމަށެވެ.
ރައީސް ސޯލިހުވަނީ އުމުރުން ދުވަސްވީ މީހުންގެ އެލަވަންސް 5000 ރުފިޔާއިން 7000 ރުފިޔާއަށް ބަދަލު ކުރައްވަން ވައުދުވެވަޑައިގެންފައެވެ.
އުމުރުން ދުވަސްވީ މީހުންނަށް ފުރަތަމަ އެލަވަންސް ދޭން ފަށާފައިވަނީ 2009 ވަނަ އަހަރު އޭރު އޮތް އެމްޑީޕީގެ ސަރުކާރުންނެވެ. ނަމަވެސް ފަހުން 2300 ރުފިޔާއަށް އެ އަދަދުވަނީ ބޮޑުކޮށްފައެވެ. މިހާރު ދެމުން ގެންދާ ގޮތަށް 5000 ރުފިޔާއަށް ބަދަލުކޮށްފައިވަނީ ރައީސް އަބްދުﷲ ޔާމީންގެ ސަރުކާރުގައެވެ.
ދުވަސްވީ މީހުންގެ އެލަވަންސް އިތުރު ކުރުމުގެ އިތުރުން ސަރުކާރު ވަޒީފާތަކުން މުސްކުޅި ކުރާ އުމުރު 70 އަހަރަށް މަތި ކުރަން ނިންމާފައިވާ ކަން ވެސް ރައީދސް ސޯލިހު ވަނީ އިއުލާން ކުރައްވާފައެވެ.
