ރައްޔިތުންގެ މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމެއްގައި، ސީއެންއެމް އިން ކުރި ސުވާލެއްގެ ޖަވާބުގައި ރައީސް ނަޝީދު ވިދާޅުވީ، ވެރިކަމުގެ ނިޒާމާއި ގުޅިގެން ރައްޔިތުންގެ ފެންނަ ނުފެންނަ ވޯޓެއް ހަމައެކަނި ނެގުމަކުން އަދި ނުނިމޭ ކަމަށް ގަބޫލުކުރައްވާ ކަމަށާއި، ރައްޔިތުން ވެރިކަމުގެ ނިޒާމް ބަދަލުކުރުމަށް ފެންނަކަމަށް ވޯޓު ދެއްވައިފިނަމަ، ގާނޫނު އަސާސީއަށް ގިނަ އިސްލާހުތަކެއް ގެންނަން ޖެހޭނެ ކަމަށެވެ.
އެގޮތުން މިހާރު އަމަލުކުރެވުމުންދާ ގާނޫނުއަސާސީގައި ބަޔާންކޮށްފައި އޮތީ ރިޔާސީ ނިޒާމެއް ކަމަށްވުމާއެކު، ރައީސުލްޖުމްހޫރިއްޔާގެ ބާބަށް ގިނަ އިސްލާހުތަކެއް ގެންނަން ޖެހޭނެ ކަމަށެވެ. އަދި އެކަމުގެ މަސައްކަތްތައް މިހާރުވެސް ފެށިފައިވާކަމަށްވެސް ރައީސް ނަޝީދު ވިދާޅުވިއެވެ.
ސީއެންއެމްގެ އިތުރު ސުވާލަކަށް ޖަވާނު ދެއްވަމުން ރައީސް ނަޝީދު ވިދާޅުވީ، ބަރުލަމާނީ ނިޒާމެއްގައި ވަޒީރުން ޖަވާބުދާރީ ކުރުވުމަކީ ވަރަށް ފަސޭހައިން ކުރެވޭނެ ކަމެއް ކަމަށާއި، ސަބަބަކީ ވަޒީރުން އަބަދުވެސް ތިއްބަވާނީ ރައްޔިތުންގެ މަޖިލީހުގެ އިދާރާގައި ކަމަށްވުމެވެ. އެހެންކަމަށްވުމާއެކު، މެމްބަރަކަށް އެމެމްބަރަކު ބޭނުން ސުވާލެއް އަބަދުވެސް ކޮށްލުމުގެ ފުރުސަތު ލިބިގެންދާނެކަމަށްވެސް ރައީސް ނަޝީދު ވިދާޅުވިއެވެ.
މީގެ އިތުރުން ބަރުލަމާނީ ނިޒާމެއްގައި އެއްމެ ރަގަޅު އެއްސިފައަކީ، ވެރިކަން ބަދަލުކުރުމަށް ބަގާވާތް ކުރަން ނުޖެހުންކަމަށާއި، ބަގަވާތެއް ކުރަން ވެއްޖެނަމަ، އޭގެ ތެރެއަށް ސިފައިންނާއި ފުލުހުން ވައްދާ، މުޅި ގައުމު ހުއްޓުމަކަށް އަންނަކަމަށާއި، އެހެންނަމަވެސް ބަރުލަމާނީ ނިޒާމެއްގައި އެފުރުސަތު ނުލިބޭނެކަމަށްވެސް ރައީސް ނަޝީދު ވިދާޅުވިއެވެ.
