ކޮވިޑުގެ ތެރޭގައި އެމްޕީއެލްގައި ހިނގި ތެލުގެ ބޮޑު ހިޔާނާތުގައި ތުހުމަތު ކުރެވޭ މުވައްޒަފަކަށް އެއް ރުފިޔާގެ ބަދަލެއް ނަގައިދޭން ހައިކޯޓުން ހުކުމް ކުރީ، އެ މައްސަލައިގައި ވަޒީފާއާ ބެހޭ ޓްރައިބިއުނަލުން ކުރި ހުކުމް، އެ ކުންފުނީގެ ފަރާތުން ހައިކޯޓުގައި އިސްތިއުނާފު ކުރުމުންނެވެ. އެ މައްސަލަ އެ މުވައްޒަފުގެ ފަރާތުން ސުޕްރީމް ކޯޓަށް ހުށަހަޅާފައިވަނީ، މިދިޔަ ހަފްތާގައި ކަމަށްވނީ މައުލޫމާތު ލިބިފައެވެ. އެ މައްސަލަ ބަލައިގަތުމާ މެދު ސުޕްރީމް ކޯޓުން އަދި ވަކިގޮތެއް ނުނިންމައެވެ.
މި މައްސަލައިގައި ހިމެނޭ މުވައްޒަފު، 2021 ވަނަ އަހަރު ވަޒީފާއިން ވަކިކުރި، އެމްޕީއެލްގެ އޭރުގެ ޗީފް މެނޭޖަރުކަމުގެ މަގާމުގައި ހުއްޓައެވެ. އެއީ ކޮވިޑްގެ ބަލިމަޑުކަމުގެ ތެރޭގައި އެމްޕީއެލްގެ ބައެއް މުވައްޒަފުން ބައިވެރިވެގެން ހިންގި އެތައް މިލިއަން ރުފިޔާއެއްގެ މި ހިޔާނާތުގައި ބައިވެރިވާ ކަމަށް ޝައްކު ކުރެވިގެންނެވެ.
ހައިކޯޓުގެ ހުކުމުގައިވާ ގޮތުން އެމްޕީއެލް އާއި ފިއުލް ސަޕްލައި މޯލްޑިވްސްގެ ބައެއް މުވައްޒަފުން ގުޅިގެން ހިންގި މި ހިޔާނާތުގައި އެމްޕީއެލްގެ ލިޔުންތައް ފޯޖްކޮށް 976،972 ލިޓަރުގެ ތެޔޮ އެމްޕީއެލް އަށް ގަތް ކަމަށް ލިޔެކިޔުމުން ދައްކާފައިވެ އެވެ. ތެޔޮ ނުލިބެނީސް، އެ ލިބުނު ކަމަށް ލިޔުންތަކުން ދެއްކުމަށް ފަހު 8.7 މިލިއަނަށް ވުރެ ގިނަ ރުފިޔާ އަށް ހިޔާނާތްތެރިވެފައިވާ ކަމަށް އެމްޕީއެލް އިން ބުނެފައިވާކަން ހުކުމުގައި ވަނީ ފާހަގަކޮށްފަ އެވެ.
އެ މައްސަލަ ފުރަތަމަ އެ މުވައްޒަފުގެ ފަރާތުން ފަރާތުން ވަޒީފާއާ ބެހޭ ޓްރައިބިއުނަލަށް ހުށަހެޅުމުން އެ ތަނުން ނިންމާފައިވަނީ އައިމަން ވަޒީފާއިން ވަކިކޮށްފައިވަނީ އިޖުރާއީ އަދި މައުޟޫއީ އަދުލުވެރިކަން ގާއިމްކުރުމެއް ނެތި ކަމެވެ. އޭނާއަށް ބަދަލުގެ ގޮތުގައި މުސާރަ އާއި އިނާޔަތުގެ ގޮތުގައި ލިބެމުން ދިޔަ ގާތްގަނޑަކަށް 19،000ރ. ވަޒީފާއިން ވަކިކުރި ތާރީހުން ފެށިގެން ޓްރައިބިއުނަލުން މައްސަލަ ނިންމި ތާރީހާ ދެމެދުގެ މުއްދަތަށް ދިޔުމަށް އަމުރުކޮށްފައިވެ އެވެ. އެއީ ގާތްގަނޑަކަށް 112،164ރ. އެވެ. އޭނާގެ ވަޒީފާ ރުޖޫއަކުރުމަށް ވެސް އަމުރުކޮށްފައިވެ އެވެ. މި ނިންމުމާމެދު މެދު ހިތްހަމަނުޖެހިގެން ހައިކޯޓަށް މައްސަލަ ހުށަހެޅީ އެމްޕީއެލުންނެވެ.
