ހޯމަ ދުވަހު "މޯލްޑިވްސް ނޭޝަނަލް އެއާ ޓްރެފިކް ސާވިސް" ގެ ނަމުގައި އުފެއްދި ކުންފުންޏާ އެކު، އެއާ ޓްރެފިކްގެ ހުރިހާ ހިދުމަތްތަކެއް ބަދަލު ވާނީ އެ ކުންފުނީގެ ދަށަށެވެ. މޯލްޑިވްސް ނޭޝަނަލް އެއާ ޓްރެފިކް ސާވިސްގެ މެނޭޖިން ޑިރެކްޓަރަކަށް އައްޔަންކުރައްވާފައިވަނީ ތަޖުރިބާކާރު އެއާޓްރެފިކް ކޮންޓްރޯލަރު މުހައްމަދު އަހުތަރެވެ.

މޯލްޑިވްސް ނޭޝަނަލް އެއާ ޓްރެފިކް ސާވިސް އުފެއްދުމާ ހަމައަށް ވައިގެ ދަތުރުތައް މެނޭޖްކުރަމުން ގެންދިޔައީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ އެއާ ޓްރެފިކް މެނޭޖްމަންޓް ޔުނިޓުގެ ދަށުން، އެއާ ޓްރެފިކް ކޮންޓްރޯލް ސެންޓަރު އަދި ކޮންޓްރޯލް ޓަވަރުންނެވެ.

ސަރުކާރުން ބުނީ ދަތުރުފަތުރުގެ ނިޒާމަށް ގެނައި ބަދަލުތަކާ އެކު ރާއްޖޭގައި އެއާޕޯޓުތައް ގިނަވުމާއި ސީޕްލޭން އޮޕަރޭޝަން އިތުރުވުމުގެ ސަބަބުން ވައިގެ ސަރަހައްދުގައި އުދުހޭ މަތިންދާ ބޯޓުތައް ގިނަވެފައިވަނީ ލަފާކޮށްފައި ނުވާ މިންވަރަކަށް ކަމަށެވެ. އެގޮތުން ރާއްޖޭގެ ވައިގެ ސަރަހައްދުގައި އެއްވަގުތެއްގައި އުދުހޭ ފްލައިޓުތަކުގެ އަދަދު 60 އަދި 70 މޫވްމަންޓަށް އިތުރުވެފައިވާއިރު، އެއާޓްރެފިކް ކޮންޓްރޯލް ހިދުމަތްތައް ފޯރުކޮށްދިނުމަށް ބޭނުންކުރެވޭ ވަސީލަތްތަކަށް ބަދަލުތަކެއް ވަނީ ގެންނަން ޖެހިފައި ކަމަށް ބުނެއެވެ.

އެއާ ޓްރެފިކް ކޮންޓްރޯލްގެ ހިދުމަތް ހަރުދަނާކުރުމަށް ވަކި ކުންފުންޏެއް އުފައްދާފައި ވަނީ ޗިކާގޯ ކޮންވެންޝަންގައިވާ ގޮތަށް ސަލާމަތާއި ރައްކާތެރިކަން ދެމެހެއްޓޭނެ ގޮތެއްގައި މި ހިދުމަތް ފޯރުކޮށްދިނުމަށެވެ.