ރިޔާސީ އިންތިހާބުގެ ކެމްޕެއިންގައި އެމްޑީޕީ އާ ގުޅިފައިވާ ޕާޓީތަކުން ސޯސަން ޖަގަހައިގައި ބާއްވަމުންދާ ޖަގަހަ ޖަލްސާގައި ވާހަކަދައްކަވަމުން ޝާހިދު ވިދާޅުވީ މާލޭ ރައްޔިތުންނަށް މިހާރު ގޯތި ދީފައިިވާ ތަންތަނަކީ ގޯތި ދިނުމަށް ކަމުދާ ތަންތަން ނޫން ކަމަށް ޕީޕީއެމުން ބުނަމުން ގެންދާ ކަމަށެވެ. ޕީޕީއެމުން ބުނަމުން އަންނަނީ މާލޭ ރައްޔިތުން ދިރިއުޅެންވީ ވާދޫކަނޑު ހުރަސްކޮށް އޮތް "މާދިއްގަރު" (ފުށިދިއްގަރު) ފަޅުގައި ހިއްކާ ތަނެެއްގައި ކަމަށް ޝާހިދު ވިދާޅުވިއެވެ.
ޝާހިދު ވިދާޅުވެފައިވަނީ ޑރ. މުއިއްޒަކީ އެމްޑީޕީގެ ފުރަތަމަ ސަރުކާރުން ގުޅިފަޅުގައި ފްލެޓު އަޅާފައި ފްލެޓު ދިން މީހުންގެ އަތުން އެ ތަންތަން އަތުލި ސަރުކާރުގެ ހައުސިން މިނިސްޓަރު ކަމަށެވެ. އޭނާގެ ވާހަކަގައި މާލޭގެ ރައްޔިތުންނަށް މިހާރު ދޫކޮށްފައިވާ ގޯތިތައް ޑރ. މުއިއްޒު އަތުނުލައްވާނެ ކަމަށް ނުވިސްނަންވީ ސަބަބެއްގެ ގޮތުގައި ދެއްކެވީ ގުޅިފަޅަށް އޭރުވީ ވީގޮތެވެ.
ޝާހިދު ވިދާޅުވި ގޮތުގައި ގޯތިތައް އޮންނާނެކަން ކަށަވަރުކުރެވޭނީ ހޮނިހިރު ދުވަހު ބާއްވާ އިންތިހާބުގައި ރައީސް އިބްރާހިމް މުހައްމަދު ސޯލިހަށް ވޯޓުދެއްވައި އެމަނިކުފާނު އިންތިހާބު ވެގެން ކަމުގައެވެ.
އިންތިހާބަށް ކުޑަތަންވެފައިވާއިރު އިންތިހާބުގައި ވޯޓްލުމަށް ވީހާ ގިނަ ބަޔަކު ނިކުތުމަށް ދެ ޕާޓީންނާއި އީސީން ވެސް ދަނީ ގޮވާލަމުންނެވެ. މި އިންތިހާބުގައި ދެ ލައްކައަށް ވުރެ ގިނަ މީހުންނަށް ވޯޓްލުމުގެ ހައްގު ލިބިގެންވެ އެވެ.
