ރާއްޖޭގެ ރައީސަކަށް އިންތިހާބުވެވަޑައިގެންނެވީތީ ޑރ. މުއިއްޒަށް މަރުހަބާ ދަންނަވާ އިމްރާން މިއަދު އެކްސްގައި ވިދާޅުވީ ދިވެހިން ގޮތް ނިންމައިފި ކަމަށާއި މި ހަލަބޮލި ދުވަސްވަރު ވެރިކަން ކުރުމަކީ ފަސޭހަކަމެއް ކަމަށް ނުފެންނާތީވެ، ހެޔޮގޮތުގައި ސާބިތުވެ ހުންނެވުމަށް ޑރ. މުއިއްޒަށް ނަސޭހަތްތެރިވެ ވަޑައިގެންފައިވާ ކަމަށެވެ.
އިއްޔެ ބޭއްވި ރިޔާސީ އިންތިހާބުގެ ވަގުތީ ނަތީޖާ އިއުލާނުކޮށްފައިވާއިރު، އިމްރާނުގެ އަދާލަތު ޕާޓީން ކޯލިޝަން ހެދި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް ސޯލިހަށް ލިބިވަޑައިގެންނެވީ ލިބިވަޑައިގެންފައިވަނީ 45 އިންސައްތަ ވޯޓެވެ. އެއީ 109،868 ވޯޓެވެ. ޑރ. މުއިއްޒު އިންތިހާބު ކާމިޔާބު ކުރައްވާފައިވަނީ 129،159 ވޯޓު ހޯއްދަވައިގެންނެވެ. އެއީ ވޯޓު ލީ މީހުންގެ 54 އިންސައްތައެވެ.
އިންތިހާބުގައި ލިބުނު ނާކާމިޔާބީއަށް ފަހު، ފުރަތަމަ ފަހަރަށް ކުރެއްވި އެކްސްގައި މިއަދު އިމްރާން ވިދާޅުވެފައިވަނީ އިންތިހާބުން ލިބުނު ނާކާމިޔާބީގަައި ހެވެއް އޮންނާނެ ކަމަށެވެ. އޭނާ އާއެކު މަސައްކަތް ކުރެއްވި ކޮންމެ ބޭފުޅަކު މި ބަސް އެތައް ފަހަރު އަހާފައިވާނެ ކަމަށް އިމްރާން ވިދާޅުވިއެވެ.
ރިޔާސީ އިންތިހާބުގެ ކެމްޕެއިނުގެ ތެރޭގައި އިމްރާން ވަނީ ޑރ. މުއިއްޒަށް ގިނަ ފާޑުކިއުންތަކެއް އަމާޒުކުރައްވާފައެވެ. އެގޮތުން ކިޔުއްވާ ފާޑުކިއުންތަކަށް ގިނަ ބައެއްގެ ސުވާލުތައް ކުރިމަތި ކުރެއްވުމުން އިމްރާން ވިދާޅުވެފައިވަނީ އޭނާއަށް ޑރ. މުއިއްޒު ވަރަށް ރަނގަޅަށް އެނގޭ ކަމަށާއި އެނގޭ މީހުންނަށް އޮންނަނީ ނޭނގޭ މީހުންނަށް ބުނެދިނުން ކަމަށެވެ.
