އިންތިހާބީ ރައީސް ޑރ. މުޙައްމަދު މުއިއްޒުގެ ރަނިން މޭޓް، ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފް (ސެމްބެ), ނޮވެމްބަރު މަހު ނައިބު ރައީސް ކަމުގެ ހުވާ ކުރެއްވުމުން އެ ދާއިރާގެ ގޮނޑި ހުސްވާނެއެވެ.
އީސީގެ ނައިބު ރައީސް އިސްމާއީލް ހަބީބު މިއަދު ކުރެއްވި ޓްވީޓެއްގައި ވަނީ، މިހާލަތުގައި ކަންތައް ކުރުމަށް ގާނޫނޫ އަސާސީގައި ބަޔާންކުރާ ގޮތް ހާމަކުރައްވާފައެވެ.
ގާނޫނުއަސާސީގެ 78 ވަނަ މާއްދާގައި ބުނާ ގޮތުން މެންބަރަކު ވަކިވުމުގެ ސަބަބުން ހުސްވާ ގޮނޑި އަށް އެ ގޮނޑި ހުސްވި ތާރީހުން ފެށިގެން 60 ދުވަހުގެ ތެރޭގައި މެންބަރަކު އިންތިހާބު ކުރަން ޖެހޭނެ އެވެ.
އެހެން ނަމަވެސް މެންބަރެއްގެ ގޮނޑި ހުސްވާ ތާރީހާއި ރައްޔިތުންގެ މަޖިލީހުގެ އިންތިހާބާ ދެމެދު ހަ މަސް ނުވަތަ އެއަށް ވުރެ ކުރު މުއްދަތެއް އޮތް ނަމަ އެ ގޮނޑިއަކަށް މެންބަރަކު އިންތިހާބު ކުރާކަށް ނުޖެހެ އެވެ.
ދެހާސް ނަވާރަ ވަނަ އަހަރުގެ މަޖިލިސް އިންތިހާބު ބޭއްވީ އޭޕްރިލް ހަޔެއްގައެވެ. މީގެ ކުރިން އީސީން ވަނީ އަންނަ އަހަރު ވެސް މަޖިލިސް އިންތިހާބު އޭޕްރިލް މަހު ބޭއްވުމަށް މަސައްކަތްކުރަމުން އަންނަ ކަމަށް ބުނެފައެވެ.
ރަސްމީ ތާރީހް އިލެކްޝަންސް ކޮމިޝަނުން އަދި އިއުލާނެއް ނުކުރެ އެވެ.
