"ވަގުތު ޓީވީ" އިން ފޮނުވި ހާއްސަ ބަސްތީގަތުމެއްގަ މުއިއްޒު ވދިަޅުވީ ގުރައިދޫއަށް ވަޑައިގަތުމަށް ނިންމެވީ، ކެމްޕޭނު ޓީމާ މަޝްވަރާކުރުމަށްފަހު އެންމެ މަތިން ވޯޓުލިބުނު ރަށްތަކަށް އެންމެ ފުރަތަމަ ވަޑައިގަތުމަށް ނިންމަވާފައިވާތީކަމަށެވެ.
"ހުރިހާ ރަށަކުން ވެސް އަލުން އަޅުގަނޑު އަންނަން ދިޔައީ އެދެމުން. ޕާޓީގެ ލީޑަޝިޕުގައި މަޝްވަރާކޮށް ނިންމީ، އިންތިހާބަށް ފަހު އެންމެ ފުރަތަމަ ޒިޔާރަތް ކުރާނީ، އެންމެ މަތީ ޕަސެންޓޭޖަކުން ވޯޓު ލިބޭ ރަށަކަށްކަމަށް،" މުއިއްޒު ވިދާޅުވިއެވެ.
އިންތިހާބީ ރައީސް އަށް އެންމެ މަތިން ވޯޓު ލިބިވަޑައިގަތް ރަށަކީ ތ. ގުރައިދޫއެވެ. އެގޮތުން އެއް ފޮށިން 75.6 ލިބިވަޑައިގަތް އިރު އަނެއް ފޮށިން 72.4 ޕަސަންޓު އެރަށުން ލިބިވަޑައިގަތެވެ.
"އަޅުގަނޑުމެން މަސައްކަތް ފަށައިގަނެ ބައެއް ކަންކަން ސަރުކާރުގެ ތެރޭގައި ވެސް ހަމަޖައްސަން ހުންނާނެ. އެހެން ނަމަވެސް ވަރަށް އަވަހަށް، މާގިނަ ދުވަހެއް ނުވާނެ ގުރައިދޫ އަށް ދާން،" -މުއިއްޒު-
ދާއިމީ ނަތީޖާ ދައްކާގޮތުން ރިޔާސީ އިންތިހާބުގެ ދެ ވަނަ ބުރުގަ އެމްޑީޕީގެ ކެނޑިޑޭޓު ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 109،868 ވޯޓެވެ. ޕީއެންސީގެ ފަރާތުން ވާދަކުރެއްވި ޑރ. މުއިއްޒު އަށް ލިބިވަޑައިގަތީ 129،159 ވޯޓެވެ.
