މިރޭ ކުރިއަށް ގެންދިޔަ އެ ޕާޓީގެ ކައުންސިލް ބައްދަލުވުމެއްގައި ކައުންސިލް މެމްބަރަކު ޕީޕީއެމް-ޕީއެންސީއާއެކު ހަދާފައިވާ އެއްބަސްވުމާ ގުޅޭގޮތުން ސުވާލުކުރެއްވުމުން ނާޒިމް ވަނީ އެ އެއްބަސްވުމާ ގުޅޭ ބައެއް މައުލޫމާތުތައް ހާމަކޮށްފައެވެ.
އެގޮތުން ނާޒިމް ވިދާޅުވީ އެ އެއްބަސްވުމުގައި އިންތިހާބުތަކާ ގުޅޭ ހާއްސަ މާއްދާއެއް އެކުލެވިފައިވާނެ ކަމަށެވެ.
ޕްރައިމަރީއެއް ބާއްވާނެ ގޮތުގެ މިސާލެއް ކިޔާދެއްވަމުން ނާޒިމް ވިދާޅުވީ ތިން ޕާޓީ މީހުން މޭޔަރުކަމަށް ކުރިމަތިލާން ބޭނުން ވެއްޖެ ނަމަ އެ ތިން ޕާޓީން ނިކުންނަ މީހުންގެ މެދުގައި ޕްރައިމަރީއެއް ބާއްވާއިގެން މޮޅުވާ މީހަކަށް ތިން ޕާޓީންވެސް ތާއީދުކުރަންވާނެ ކަމަށެވެ.
މަޖިލީސް އިންތިހާބާ އަދި އެހެން އިންތިހާބުތަކުގައި ވެސް އަމަލުކުރަން އެއްބަސްވެފައިވަނީ ހަމަ އެގޮތަށް ކަމަށް ނާޒިމް ވިދާޅުވިއެވެ.
މިރޭ އޮތް އެމްއެންޕީ ކައުންސިލް ބައްދަލުވުމުގައި ނާޒިމް ވަނީ ޕީޕީއެމް-ޕީއެންސީ އާއެކު ވެފައިވާ އެއްބަސްވުމަށް އެފަރާތުން އިހުތިރާމް ކުރައްވާނެކަމަށް އުންމީދުކުރާކަމަށް ވިދާޅުވެފައެވެ.
އަންނަ ޖެނުއަރީ މަހު މާލެ ސިޓީ މޭޔަރުކަމުގެ އިންތިހާބު އޮންނަ އިރު އަންނަ އަހަރު ކުރީކޮޅު ރައްޔިތުންގެ މަޖިލީހުގެ އިންތިހާބުވެސް އޮންނާނެ އެވެ.
