މިގޮތަށް އެދިފައިވަނީ، ސަރުކާރު ބަދަލުވާ މަރުހަލާގައި ސަރުކާރުގެ ކުންފުނިތަކުން އާ މަޝްރޫއުތައް ފަދަ ކަންކަން ނުހިންގުމަށް އިލްތިމާސްކޮށް މިފަހުން ޕީސީބީން ނެރެފައިވާ ސާކިއުލާ އާ ގުޅިގެން އެ ބޯޑުގެ ވެރިން މިއަދު އެސްއޯއީ ކޮމިޓީއަށް ހާޒިރުކުރުމުން ނެވެ.
އެސްއޯއީ ކޮމިޓީ ބައްދަލުވުމުގައި ޕީސީބީގެ ހިންގެވުމާ ހަވާލުވެ ހުންނެވި އެ ބޯޑުގެ ނައިބު ރައީސް މުހައްމަދު ފިރާޒު ވިދާޅުވީ، ޕީސީބީއާ މެދު ސިޔާސީ ނަޒަރަކުން ނުވިސްނެވުމަށް އެދޭ ކަމަށާއި، ގާނޫނީ އިމުގެ ތެރެއިން އެ ބޯޑުން ކުރަންޖެހޭ މަސައްކަތްތައް ކުރުމުގެ ފުރުސަތު ފަހިކޮށްދިނުމަށް އެދޭ ކަމަށެވެ.
އެގޮތުން ފިނޭންސް މިނިސްޓްރީގެ ދަށުން އެ ބޯޑުގެ އިދާރީ މަސައްކަތްތައް ބެލެހެއްޓުމަށް ގާނޫނުގައި އޮންނަ މާއްދާ ބަދަލުކޮށް، އެ މަސައްކަތް އެ ބޯޑުގެ ދަށަށް ބަދަލުކޮށްދިނުމަށް އެދިވަޑައިގެން ނެވި އެވެ.
ޕީސީބީ އުފެއްދީ 2013 ވަނަ އަހަރު އެވެ. ޕީސީބީ ގާނޫނުން އެ ބޯޑުގެ އިދާރީ މަސައްކަތް ހަވާލުކޮށްފައި އޮންނަނީ ފިނޭންސް މިނިސްޓްރީ އާއެވެ. އެ ބޯޑަކީ، ސަރުކާރުގެ މިލްކުގައިވާ ދައުލަތުގެ ވިޔަފާރި ތަންތަނާއި އެތަންތަނުގެ މިލްކުގައިވާ އެއްޗެހި ޕްރައިވަޓައިޒްކުރުމާއި، ކޯޕަރަޓައިޒްކުރުމާއި، މޮނިޓަކުރުމާއި، އިވެލުއޭޓްކުރުމާއި ދައުލަތުގެ ވިޔަފާރި ތަންތަނުން ހިއްސާ އާންމުކޮށް ވިއްކުމުގެ ނިންމުންތައް ނިންމުމުގެ މަސްއޫލިއްޔަތު ހަވާލުވެފައިވާ ތަނެކެވެ.
