އަބްދުއްރަހީމް ވިދާޅުވީ ފަސް އަހަރުގެ ފަހުގެ ސުވާލަކަށް މިއަދު ޖަވާބު ދިނުމަކީ އެހާ ފަސޭހަކަމަކަށް ނުވާނެ ކަމަށެވެ. މަލްޓި ޕާޓީ ޑިމޮކްރަސީއެއް އައިފަހުން ފަސް އަހަރުން ފަސް އަހަރުން ސަރުކާރު ބަދަލުވަމުންދާކަން ފާހަގަކުރައްވާ އަބްދުއްރަހީމް ވިދާޅުވެފައިވަނީ 180 އެތައް ރަށެއްގެ މައްޗަށް އެކުލެވޭ ރާއްޖެފަދަ ޖަޒީރާ ގައުމެއްގައި ރައްޔިތުން ބޭނުންވާ ތަރައްގީ ގެންނަން ފަސް އަހަރު މަދު ކަމަށެވެ.
އަބްދުއްރަހީމް ވިދާޅުވި ގޮތުގައި ސަރުކާރަށް އަންނަނީ މުއިއްޒު ގޮވައިގެން 10 އަހަރުގެ ވެރިކަމެއް ކުރުމަށް ކަމުގައެވެ. މި ފަސް އަހަރު ނިންމާފައި ދެން އަންނަ ފަސް އަހަރަކަށް މުއިއްޒު ގޮވައިގެން ކެމްޕެއިނަށް ދާނީ ވީ ވައުދުތައް ފުއްދާފައި ކަމަށް އަބްދުއްރަހީމް ވިދާޅުވިއެވެ. އެ ރަށަކަށް ވީ ވައުދާ ގުޅޭގޮތުން ރައްޔިތުން އޭރަށް ސުވާލުކުރަން ނުޖެހޭނެ ކަމަށް އޭނާ ވިދާޅުވިއެވެ.
އަބްދުއްރަހީމް ވިދާޅުވީ މުއިއްޒުގެ ފަސް އަހަރުގެ ދައުރަކަށްފަހު އަންނަ ހާލަތުގައި އޭނާ ތާއީދު ކުރާނީ ކުރީގެ ރައީސް، ރައީސް އަބްދުﷲ ޔާމީނަށް ނުވަތަ މުއިއްޒަށްތޯ ކުރާ ސުވާލަށް މިއަދު ދޭން ނުޖެހޭ ކަމަށެވެ. އެ ޕާޓީގެ އަސާސީ ގަވާއިދުގައި ބުނަނީ ޕާޓީގެ ޓިކެޓުގައި ވާދަކޮށް، އިންތިހާބު ކާމިޔާބު ކުރާ ވެރިއަކު ދެވަނަ ދައުރަަކަށް ކުރިމަތިލާން ބޭނުންވާ ނަމަ ޕްރައިމަރީ އަކާ ނުލާ ޓިކެޓް ދެވިދާނެ ކަމަށެވެ.
