ކަސްޓަމްސްއިން މިއަދު ބުނީ މި މަހުގެ ހަތްވަނަ ދުވަހު ޕާކިސްތާނުން ރާއްޖެ އައި 20 އަހަރުގެ އަންހެން ފަސިންޖަރެއްގެ އަތުން 4.7 ކިލޯގެ މަސްތުވާތަކެތި އަތުލައިގަނެފައިވާ ކަމަށެވެ. އެ ތަކެތި އަތުލައިގެންފައި ވަނީ އެ ފަސެންޖަރުގެ ލަގެޖުގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކު ކުރެވިގެން އޭނާގެ ލަގެޖު ބަލައި ފާސްކުރުމުގެ ތެރޭގައި ކަމަށް ކަސްޓަމްސްއިން ބުނެއެވެ.
ކަސްޓަމްސްއިން ބުނެފައިވަނީ މަސްތުވާތަކެތި ކަމަށް ޝައްކުކުރެވޭ ތަކެތި ހުރި ޕެކެއް ފެނުމުން، އެތަކެތި ފުރަތަމަ މަރުހަލާގައި އެ އިދާރާއިން ތަހުލީލު ކުރި އިރު، މަސްތުވާތަކެތީގެ ބާވަތެއް ކަމަށްވާ ހެރޮއިންއަށް ޕޮޒިޓިވްވެފައިވާ ކަމަށެވެ.
މި މައްސަލައިގައި އަތުލައިގަނެވުނު މަސްތުވާތަކެތީގެ ބަރުދަނުގައި ޖުމްލަ 4.7 ކިލޯ ހުރިއިރު، އޭގެ އަގު 5.8 މިލިއަން ރުފިޔާއަށް އަރާ ކަމަށް ކަސްޓަމްސްއިން ބުނެއެވެ. ކަސްޓަމްސްއިން ބުނި ގޮތުގައި އަތުލައިގަނެވުނު މަސްތުވާތަކެއްޗާއި އެތަކެތި އެތެރެކުރަން މަސައްކަތް ކުރި އަންހެން މީހާ ދިވެހި ފުުލުހުންގެ ހިދުމަތާ ހަވާލުކޮށްފައިވާ ކަމުގައެވެ.
