ފުލުހުންގެ އިންޓާނަލް ބްލޮގެއްގައި އެމްސީ ވިދާޅުވެފައިވަނީ، އޭނާ ފުލުހުންގެ ކޮމިޝަނަރުކަމާ ހަވާލުވެ ވަޑައިގަތްއިރު ފުލުހުންގެ އަގު ވަރަށް ބޮޑަށްވެއްޓިފައިވާކަމަށެވެ.
އޭނާ ވިދާޅުވީ އޭނާ ކޮމިޝަނަރުކަމުގެ މަގާމު އަދާކުރެއްވުމުގަ އެންމެ ބޮޑު ގޮންޖެހުމަކަށް ދިމާވީ 2012 ވަނަ އަހަރު ކެރިއަރުގަ ޖެހުނު ލައްގަނޑުކަަށެވެ. އެއީ ފުލުހުންގެ ސިއްރު މައުލޫމާތު ލީކުކުރިކަމަށް ތުހުމަތުކޮށް 2013 ވަނަ އަހަރު އިދާރީ ފިޔަވަޅެއް އޭނާގެ މައްޗަށް އެޅުމެވެ.
އިދާރީ ފިޔަވަޅަށްފަހު އަލުން މަސައްކަތް ކުރެއްވުމަށް ފުރުސަތު ލިބިލެއްވުމާއި ގުޅޭގޮތުން ހަމީދު ވިދާޅުވިއެވެ.
އިދާރީ ފިޔަވަޅުގެ މައްސަލަ ސީޕީ ހަމީދު ސިވިލް ކޯޓަށް ހުށަހެޅުމުން، ކޯޓުން ހުކުމްކުރީ އޭނާއަށް ވަޒީފާ އަނބުރާ ދިނުމަށެވެ. ނަމަވެސް ހައިކޯޓުން ހަމީދާ ދެކޮޅަށް އަނެއްކާވެސް މައްސަލަ ނިންމިއެވެ. އަދި 2018 ވަަނަ އަހަރު އޭނާ އަލުން ސުޕްރީމް ކޯޓުން މައްސަލަ ރިވިއުކުރެއްވިއެވެ. ސުޕްރީމް ކޯޓުން ވެސް ނިންމީ ދަށު ކޯޓާއެއްގޮތަށް ހަމީދަށް އަލުން ވަޒީފާ ދޭންޖެހޭނެކަމަށެވެ.
ކުރިއަށް މި އޮތް މަސް ދުވަހުގެ ތެރޭގައި ދިވެހި ފުލުހުންގެ ހިދުމަތުން ޝަރަފުވެރިކަމާ އެކު ވަކިވެވަޑައިގަންނަވާނެ ކަމަށް ހަމީދު ވަނީ ވިދާޅުވެފައެވެ.
ފުލުހުންގެ އިސްވެރިން ހިމެނޭ އެ މުއައްސަސާގެ ޕްލެޓްފޯމަކަށް ސީޕީ ހަމީދު ފޮނުއްވެވި ދިގު މެސެޖެއްގައި ވަނީ 2012 ވަނަ އަހަރު ފުލުހުންގެ ހިދުމަތުން އޭނާ ވަކި ކުރެއްވުމާއި އަލުން ހިދުމަތާއި ގުޅިވަޑައިގެންނެވުމަށް ފުރުސަތު ލިބިވަޑައިގެންނެވި ގޮތާ ގުޅޭގޮތުން އަލިއަޅުއްވާލައްވާފައެވެ.
ހަމީދުގެ މެސެޖުގައި މިދިޔަ ހަތަރު އަހަރާއި ހަ މަސް ދުވަހުގެ ތެރޭގައި އޭނާގެ ލީޑާޝިޕްގައި ފުލުހުންގެ ހިދުމަތް ތަރައްގީ ކުރުމަށް ކުރެއްވި މަސައްކަތްތައް ވަނީ ފާހަގަ ކުރައްވާފައެވެ.
ފުލުހުންގެ ލީޑާޝިޕްގައި ހިމެނިވަޑައިގަންނަވާ ހުރިހާ ބޭފުޅުންނަށް ޝުކުރު އަދާ ކުރައްވާ ހަމީދު ވިދާޅުވީ އޭނާ މިހާރު ތައްޔާރުވަމުން އަންނަނީ ކުރިއަށް އޮތް މަހެއްހާ ދުވަހުގެ ތެރޭގައި ފުލުހުންގެ ހިދުމަތުން ޝަރަފުވެރިކަމާ އެކު ވަކިވެވަޑައިގެންނެވުމަށް ކަމަށެވެ.
ރައީސް އިބްރާހިމް މުހައްމަދު ސޯލިހުގެ ވެރިކަމުގެ ދައުރު އަންނަ ނޮވެމްބަރު މަހުގެ 17 ވަނަ ދުވަހަށް ހަމަވުމުގެ ކުރިން މަގާމުން ރިޓަޔާ ކުރައްވާނެ ކަމަށް ހަމީދުގެ މެސެޖުގައި ވަނީ ވިދާޅުވެފައެވެ. ހަމީދު ވިދާޅުވި ގޮތުގައި އޭނާ ރިޓަޔާ ކުރައްވާނެ ތާރީހެއް ކަަމަށް ލަފާ ކުރެވެނީ ނޮވެމްބަރު 11 ވަނަަ ދުވަހުއެވެ.
