ހޮނިހިރު ދުވަހުން ފެށިގެން ގައްޒާ އާއި އިޒްރޭލުގެ ދެމެދުގައި ބަދަލުކުރެވެމުންދާ ވަރުގަދަ ހަމަލާތަކުގެ ސަބަބުން އެހީތެރިކަން ބޭނުންވެފައިވާ ގައްޒާގެ ރައްޔިތުންނަށް ދިވެހީންގެ ފަރާތުން ފޯރުކޮށްދީފައިވާ އެހީގެ ތަކެތި ހުރި ގަރާޖަކަށް ގެއްލުންވެފައިވަނީ މިއަދު އިޒްރޭލުން އެ ސަރަހައްދަށް ދިން ހަމަލާއެއްގަ އެވެ.
ރާއްޖޭގެ ޓީވީ ޗެނަލްތައް ގުޅިގެން ކުރިއަށް ގެންދާ ޓެލްތޯންގައި އެ ހަމަލާ އާ ގުޅޭގޮތުން ވާހަކަދައްކަމުން، އައިއޭސީގެ މީޑިއާ ކޯޑިނޭޓަރު ހަޒާދު އަހުމަދު މިއަދު ވިދާޅުވީ، އެ ހަމަލާއަކީ ސީދާ އެ ގަރާޖަށް އަމާޒުކޮށްގެން ދިން ހަމަލާއެއް ނޫން ކަމަށެވެ.
އެ ސަރަހައްދަަށް ދިން ހަމަލާގައި ގަރާޖަށްވެސް ގެއްލުން ލިބި އެހީގެ ތެކެއްޗަށް ގެއްލުންވި ނަމަވެސް، އެތަނުގައި ބަހައްޓާފައި އެވަގުތު ހުރި ތަކެއްޗަކީ ވަރަށް މަދު އަދަދެއްގެ ތަކެތި ކަމަށްވުމުން، ގެއްލުން ލިބުނީ ވަަރަށް މަދު ތަކެއްޗެއްކަން އޭނާ ފާހަގަކުރި އެވެ.
ހަމާލާގައި އެތަނަށް ގެއްލުންވީނަމަވެސް، ކުރިއަށް އޮތް ތަނުގައިވެސް، އެ މަސައްކަތް ހުއްޓާނުލާ އެ ކެމްޕޭނުން ކުރަމުން ގެންދާނެ ކަމުގެ ޔަގީންކަން އޭނާ އެރުވި އެވެ.
ދިވެހީންގެ ފަރާތުން ފޯރުކޮށްދެމުންދާ އެހީގެ ތަކެތި ރައްކާކޮށްފައި އަބަދުވެސް ބަހައްޓަނީ ވަރަށް ރައްކާތެރިކަމާއެކު ކަން ފާހަގަކުރައްވާ، ދިވެހިން އެކަމާއި ކަންބޮޑުނުވުމަށް އޭނާ އިލްތިމާސް ކުރެއްވި އެވެ.
