މި އަހަރަށް 42.84 ބިލިއަން ރުފިޔާގެ ބަޖެޓެއް ފާސްކޮށްފައި ވީނަމަވެސް، ސަޕްލިމެންޓަރީ ބަޖެޓެއް ހުށަހަޅަނީ އިންތިހާބީ ރައީސްގެ އޮފީހާ މަޝްވަރާ ކުރުމަށްފަހުގައި ކަމަށްވެއެވެ.
މައުލޫމާތު ލިބޭ ގޮތުން މި އަހަރަށް ކަނޑައެޅި ބަޖެޓަށް ވުރެ އިތުރަށް ހަ ބިލިއަން ރުފިޔާ ހަރަދުކުރަން މަޖުުބޫރުވެފައިވަނީ ފިއުލް ސަބްސިޑީއަށް ވުރެ އިތުރަށް ހަރަދު ކުރަން ޖެހުމުންނާއި އާސަންދައިގެ ބަޖެޓު ހުސްވުމާ އަދި ސްޓޫޑެންޓް ލޯނާއި ހިލޭ ޑިގްރީގެ ސްކީމުގެ ހަރަދުތައް އިތުރުވުމާ ގުޅިގެންނެވެ.
ފިނޭންސް މިނިސްޓްރީން އެންމެފަހުން އާންމުކުރި "ވީކްލީ ފިސްކަލް ޑިވެލޮޕްމަންޓް" ރިޕޯޓުގައިވާ ގޮތުން،
- އާސަންދައަށް ބަޖެޓު ކުރި ވަރަށް 487.6 މިލިއަން ރުފިޔާ ވަނީ ހަރަދުކޮށްފައި
- ސަބްސިޑީތަކަށް 732.4 މިލިއަން ރުފިޔާ އިތުރަށް ހަރަދުކުރި
- އިންވެސްޓްމަންޓް އައުޓްލޭސްގެ ގޮތުގައި އިތުރަށް 379 މިލިއަން ރުފިޔާ ވަނީ ހޭދަކޮށްފައި
- ޑޮމެސްޓިކް ލެންޑިންއަށް އިތުރަށް 478 މިލިއަން ރުފިޔާ ހޭދަކުރި
މިދިޔަ މަހުގެ 28 ވަނަ ދުވަހު އާންމުކުރި އެ ރިޕޯޓު ބުނާގޮތުން އެހާތަނަށް ބަޖެޓުން 35.8 ބިލިއަން ރުފިޔާ ހޭދަކޮށްފައިވެއެވެ. އެއީ މި އަހަރަށް ފާސްކުރި ބަޖެޓުގެ 83.6 އިންސައްތައެވެ.
އަންނަ އަހަރަށް ލަފާކުރާ ބަޖެޓު ތައްޔާރުކުރުމުގެ މަސައްކަތް އެ މިނިސްޓްރީން ކުރަމުންދާއިރު އެ މަސައްކަތަށް އިންތިހާބީ ރައީސް ޑރ. މުހައްމަދު މުއިއްޒުގެ މަޝްވަރާ ހޯދާނެ ފިނޭންސް މިނިސްޓްރީން ވަނީ ބުނެފައެވެ. އެންމެ ލަސްވެގެން މި މަހުގެ 31 ވަނަ ދުވަހަށް މަޖިލީހަށް ބަޖެޓު ހުށަހަޅަންޖެހެއެވެ.
