ކަސްޓަމްސްއިން ނެރެފައިވާ ތަފާސް ހިސާބުތައް ދައްކާގޮތުން،

• 2022 ވަނަ އަހަރުގެ ސެޕްޓެމްބަރު މަހު 149 މިލިއަން ރުފިޔާގެ މުދާ އެކްސްޕޯޓް ކޮށްފައިވޭ
• މިދިޔަ މަހު އެކްސްޕޯޓް ކޮށްފައިވަނީ 86 މިލިއަން ރުފިޔާގެ މުދާ
• މިއީ 43 އިންސައްތައިގެ ދަށްވުމެއް

އެކްސްޕޯޓް ކުރެވުނު މުދަލުގެ އަގު ދަށްވިއިރު، 2022 ވަނަ އަހަރުގެ ސެޕްޓެމްބަރު މަހާ އަޅާބަލާއިރު، ފާއިތުވެދިޔަ މަހު އިމްޕޯޓް ކުރެވުނު މުދަލުގެ އަގުވެސް ވަނީ ދަށްވެފައެވެ.

• 2022 ވަނަ އަހަރުގެ ސެޕްޓެމްބަރު މަހު 4.4 ބިލިއަން ރުފިޔާގެ މުދާ އިމްޕޯޓްކޮށްފައިވޭ
• މިދިޔަ މަހު 4.3 ބިލިއަން ރުފިޔާގެ މުދާ ވަނީ އިމްޕޯޓްކޮށްފައި
• މިއީ ތިން އިންސައްތައިގެ ދަށްވުމެއް

ނިމިދިޔަ މަހު ދައުލަތަށް ލިބުނު އާމްދަނީ 2022 ވަނަ އަހަރުގެ ސެޕްޓެމްބަރު މަހާ އަޅާބަލާއިރު، ތިން އިންސައްތަ ވަނީ އިތުރުވެފައެވެ. މިދިޔަ އަހަރުގެ ސެޕްޓެމްބަރު މަހު 350 މިލިއަން ރުފިޔާ ލިބިފައިވާއިރު، މި އަހަރުގެ ސެޕްޓެމްބަރު މަހު ދައުލަތަށް އާމްދަނީގެ ގޮތުގައި ލިބިފައިވަނީ 360 މިލިއަން ރުފިޔާއެވެ.

ކަސްޓަމްސްގެ ތަފާސް ހިސާބުތައް ދައްކާގޮތުން މިދިޔަ މަހު ރާއްޖެއަށް އެންމެ ގިނައިން އެތެރެކޮށްފައިވަނީ ތެލެވެ. ޑީސަލް، ޕެޓްރޯލް އަދި އޭވިއޭޝަން ގޭހުގެ ގޮތުގައި އެއް ބިލިއަން ރުފިޔާގެ ތެޔޮ މިދިޔަ މަހު އެތެރެކޮށްފައިވެއެވެ. ދެވަނައަށް އެންމެ ގިނަ އަދަދަކަށް އެތެރެކޮށްފައިވަނީ ކާބޯތަކެތީގެ ބަވާތްތަކެވެ. ސެޕްޓެމްބަރު މަހު ރާއްޖެއަށް 734 މިލިއަން ރުފިޔާގެ ކާބޯތަކެތި އެތެރެކޮށްފައިވެއެވެ.

މިދިޔަ މަހު ރާއްޖޭން އެންމެ ގިނައިން ބޭރުކޮށްފައިވަނީ ގަނޑުކުރި ކަޅުބިލަމަހެވެ. އެގޮތުން 26 މިލިއަން ރުފިޔާގެ ކަޅުބިލަމަސް ވަނީ ބޭރުކޮށްފައެވެ.

މިދިޔަ މަހު އަގުގެ ގޮތުން އެންމެ ގިނައިން އިމްޕޯޓްކުރި ގައުމުތަކާއި އެ ގައުމުތަކުން އިމްޕޯޓް ކުރެވުނު މުދަލުގެ އަގުތައް (ސީއައިއެފް އަގު):

• އޮމާން - 883 މިލިއަން ރުފިޔާ (21 އިންސައްތަ)
• އިންޑިއާ - 681 މިލިއަން ރުފިޔާ (16 އިންސައްތަ)
• ޔޫއޭއީ - 500 މިލިއަން ރުފިޔާ (12 އިންސައްތަ)
• ޗައިނާ - 406 މިލިއަން ރުފިޔާ (10 އިންސައްތަ)
• ސިންގަޕޫރު - 406 މިލިއަން ރުފިޔާ (10 އިންސައްތަ)

މިދިޔަ މަހު އަގުގެ ގޮތުން އެންމެ ގިނައިން އެކްސްޕޯޓް ކުރި ގައުމުތައް:

• ތައިލެންޑް (38 އިންސައްތަ)
• އިނގިރޭސި ވިލާތް (24 އިންސައްތަ)
• ފަރަންސޭސި ވިލާތް (7 އިންސައްތަ)
• އިންޑިއާ (6 އިންސައްތަ)
• ޖަރުމަނު ވިލާތް (4 އިންސައްތަ)

މި އަހަރުގެ ސެޕްޓެމްބަރު މަހު 17،720 ޑިކްލަރޭޝަން ޕްރޮސެސްކޮށްފައިވެއެވެ. ނިމިދިޔަ އަހަރުގެ ސެޕްޓެމްބަރު މަހު ޕްރޮސެސްކޮށްފައިވަނީ 17،969 ޑިކްލަރޭޝަނެވެ. މިދިޔަ މަހު ރާއްޖޭން ބޭރުން އައި 103 އުޅަނދަކަށް ކްލިއަރެންސް ދީފައިވާއިރު، 2022 ވަަނަ އަހަރުގެ ސެޕްޓެމްބަރު މަހު 88 އުޅަނދަކަށް ކްލިއަރެންސްދީފައިވެއެވެ. ނިމިދިޔަ މަހު ރާއްޖޭން ބޭރަށް ފުރުމަށް 105 އުޅަނދަކަށް ކްލިއަރެންސް ދީފައިވާއިރު، 2022 ވަނަ އަހަރުގެ ސެޕްޓެމްބަރު މަހު 92 އުޅަނދަކަށް ކްލިއަރެންސް ދީފައިވެއެވެ.

މިދިޔަ ސެޕްޓެމްބަރު މަހު ރޯޔަލްޓީގެ ގޮތުގައި ނުވަ ލައްކަ ރުފިޔާ ދައުލަތަށް ލިބިފައިވެއެވެ.