މުއިއްޒު މިހެން ވިދާޅުވެފައިވަނީ މިއަދު ހަވީރު ހުޅުމާލެ ފުރަތަމަ ފިޔަވަހީގައި ދިރިއުޅެމުންގެންދާ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގަ އެވެ.
ހުޅުމާލެއަކީ މާލޭގެ އެއްބައި ކަމުގައިވާތީ ހުޅުމާލޭގެ އެންމެހާ މުނިސިޕަލް ހިދުމަތްތައް ދޭން ޖެހޭނީ މާލޭ ސިޓީ ކައުންސިލުންކަން ފާހަގަކުރައްވާ މުއިއްޒު ވިދާޅުވީ ރިޔާސީ ކެމްޕެއިނުގެ ތެރޭގައި ވައުދުވެވަޑައިގެންނެވި ފަދައިން އާބަންކޯއިން މިހާރު ފޯރުކޮށްދެމުން އަންނަ ހިދުމަތްތައް އެ މަނިކުފާނުގެ ސަރުކާރުގެ ފުރަތަމަ 100 ދުވަހުގެ ތެރޭގައި އެ ކައުންސިލާ ހަވާލުކުރައްވާނެ ކަމަށެވެ.
"އާބަންކޯއިން ދެމުންދާ ހިދުމަތްތައް އަޅުގަނޑުމެން ހަމަ ފުރަތަމަ ކޮޅު، ފުރަތަމަ 100 ދުވަހުގެ ތެރޭގައި ކުރާ ކަންކަމުގެ ތެރެއިން އެންމެ ފުރަތަމަ ކުރާ އެއް ކަމެއްގެ ގޮތުގައި ހުޅުމާލޭގެ ދެ ފިޔަވަހީގެ މުނިސިޕަލް ހިދުމަތް ކައުންސިލާ ހަވާލުކުރާނަން،" - އިންތިހާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު
