އައިއޭސީން ބުނެފައިވާ ގޮތުގައި އެ ޖަމިއްޔާއިން ހުޅުވާފައިވާ ގާޒާ އެމަޖެންސީ ރިލީފް ފަންޑަށް މިހާތަނަށް 23،987،108 ދިވެހި ރުފިޔާ އަދި 13،023 އެމެރިކާ ޑޮލަރު ލިބިފަ އެވެ.
މި މަހުގެ ހަތް ވަނަ ދުވަހު ފަލަސްތީނުގެ ހަމާސް ޖަމާއަތުން އިޒްރާއީލަށް ދިން ކުއްލި ހަމަލާތަކުގެ ބަދަލު ހިފުމުގެ ގޮތުން އިޒްރާއީލް ސިފައިން ވެސް ވަރުގަދަ ހަމަލާ ތަކެއް ދޭން ފެށުމުން ދެ ގައުމުގެ ހަނގުރާމަ ވަނީ ވަރުގަދަވެފަ އެވެ.
އިޒްރާއީލް ސިފައިންގެ ލާއިންސާނީ ހަމަލާތަކުގެ ސަބަބުން ގާޒާއަށް މިވަގުތު ވަނީ ކާބޯތަކެއްޗާއި ބޯފެނުގެ ދަތިކަން ބޮޑުވެފަ އެވެ.
އައިއޭސީގެ މި ފަންޑަށް ފައިސާގެ ހަދިޔާ ކުރުމުގެ ގޮތުން ރާއްޖޭގެ އެކި ކަންކޮޅުތަކުގައި އަންނަނީ ތަފާތު ހަރަކާތްތައް ހިންގަމުންނެވެ. އެގޮތުން މާލެ އާއި ރާއްޖޭގެ އެކި ސަރަހައްދުތަކުގައި ފަންޑު ފޮށިތަކެއް ބަހައްޓައި، ގާޒާ ފަންޑަށް ފައިސާ ހޯދުމުގެ މަސައްކަތް ދަނީ ކުރަމުންނެވެ. އަދި ޖަމިއްޔާ ޖަމާއަތްތަކާއި އާންމުން ގުޅިގެން ފަންޑްރެއިޒް ކުރުމަށް ހެދިކާ، ކޭކު ފަދަ ތަކެތި ވިއްކައިގެންވެސް މި ފަންޑަށް ވަނީ ފައިސާ ހޯދާފަ އެވެ. މީގެ އިތުރުން ރާއްޖޭގެ އެކި ވިޔަފާރިވެރިންނާއި މަސްދޯނިތަކުން ދީފައިވާ އެހީތައް ފާހަގަކޮށްލެވެ އެވެ.
އިސްލާމީ އުންމަތަށް ދިމާވާ ހުރިހާ ކަމެއްގައި ރައްޔިތުންގެ ފަރާތުން ލިބޭ އެހީ އާއި އެއްބާރުލުމަށް އައިއޭސީން ވަނީ ޝުކުރު ދަންނަވާފަ އެވެ.
