ދިވެހިރާއްޖޭގެ ކޯޓުތަކުގައި ޝަރީއަތްކުރުމުގެ ޝަރުއިއްޔަތާއި، އަހުމިއްޔަތާއި ވިލާޔަތު ސިވިލް ކޯޓުގެ ގާޒީ މަރްޔަމް ވަހީދު (ސ.ފޭދޫ/ބެލޫން)ގެ ކިބައިން ގެއްލިފައިވާ ކަމަށް ކަނޑައަޅައި، ދިވެހިރާއްޖޭގެ ކޯޓެއްގައި ޝަރީޢަތް ކުރުމުގެ އެއްވެސް ހައިސިއްޔަތެއް ސިވިލް ކޯޓުގެ ގާޒީ މަރިޔަމް ވަހީދުއަށް ލިބިގެންނުވާ ކަމަށް ދައުލަތުގެ ކަމާބެހޭ އެންމެހައި ފަރާތްތަކަށް ކުރީގެ ސުޕްރީމް ކޯޓުން އެންގީ ރައީސް ޔާމީންގެ ވެރިކަމުގައި އޭރުގެ ސުޕްރީމް ކޯޓުންނެވެ. އެއީ ފަނޑިޔާރަކު ކުރި ހުކުމަކާ ގުޅިގެން ރާއްޖޭގައި ފަނޑިޔާރަކާމެދު ފިޔަވަޅު އެޅި ފުރަތަމަ ފަހަރެވެ.
ސިވިލް ކޯޓުގެ އިސްގާޒީ ކަމަށް އެ ކޯޓުގެ ގާޒީ މަރްޔަމް ވަހީދު ޖޭއެސްސީން އައްޔަން ކުރީ މިއަދުއެވެ. މަރިޔަމް ވަހީދު ވެގެންދާނީ ސިވިލް ކޯޓުގެ ފުރަތަމަ އަންހެން އިސްގާޒީއަށެވެ. ސިވިލް ކޯޓުގެ އިސްގާޒީގެ މަގާމަށް މަރިޔަމް އައްޔަން ކުރީ، މީގެ ކުޑަ ދުވަސްކޮޅެއް ކުރިން ކުއްލި ގޮތަކަށް އަވަހާރަ އެ މަގާމު ހުސްކޮށް އޮތުމަށް ފަހުއެވެ.
