އިލެކްޝަން ކޮމިޝަންގެ ރައީސްކަމުގެ މަގާމުގައި ހުންނެވި ފުއާދު ތައުފީގު އޭނާގެ ދައުރު ފުރިހަމަވެ އެ ކޮމިޝަނުގެ މެމްބަރުކަމުން ވަކިވީ މިދިޔަ ހޮނިހިރު ދުވަހުއެވެ. އިލެކްޝަންސް ކޮމިޝަންގައި މެމްބަރުންގެ ތެރެއިން ކޮމިޝަންގައި އެންމެ ގިނަ ދުވަސްވީ އެއް މެމްބަރަަކީވެސް ފުއާފު ތައުފީގެވެ.
ތައިލޭންޑްގައި ހުންނަވާ ސަފީރަކަށް އައްޔަންކުރުމަށް ރައީސް ޑރ. މުހައްމަދު މުއިއްޒު މިއަދު ވަނީ ފުއާދު ތައުފީގުގެ ނަން މަޖިލިހަށް ހުށައަޅުއްވާފައެވެ. މަޖިލީހުގެ ރިޔާސަތުން ވަނީ ފުއާދުގެ ނަން ދިރާސާ ކުރުމަށް ހާރިޖީ ގުޅުންތަކުގެ ކޮމިޓީއަށް ފޮނުއްވާފައެވެ.
ފެހި ގާނޫނު އަސާސީ ގެ ދަށުން ފުރަތަމަ އެކުލަވާލި އިލެކްޝަންސް ކޮމިޝަންގެ މެމްބަރުކަންވެސް ފުއާދު ވަނީ ކުރައްވާފައެވެ. ފުއާދަކީ އޭރު ރާއްޖޭގައި އޮތް ހުރިހާ ސިޔާސީ ޕާޓީއަކުން ރުހިގެން އެފަހަރު ކޮމިޝަނަށް އައްޔަން ކުރި މެމްބަރެކެވެ.
ރާއްޖޭގެ ފުރަތަމަ ފަހަރަށް ބޭއްވި މަލްޓި ޕާޓީ ފުރަތަމަ ރިޔާސީ އިންތިހާބުގައި ފުއާދު ވަނީ ކޮމިޝަންގައި މުހިއްމު މަސައްކަތްތަކެއް ކުރައްވާފައެވެ.
2008 ވަނަ އަހަރުން ފެށިގެން 2014 ގެ ނިޔަލަށް ފުއާދު ވަނީ ކޮމިޝަންގެ މެމްބަރުކަން ކުރައްވާފައެވެ. 2013ގެ ރިޔާސީ އިންތިހާބާއި އެކު ސުޕްރީމްކޯޓުން ފުއާދުގެ މައްޗަށް އިއްވި ހުކުމާއި އެކު 2014 ވަނަ އަހަރު އޭނާ ވަނީ ކޮމިޝަނުން މަގާމުން ވަކިކޮށްފައެވެ.
2014 ވަނަ އަހަރުގެ މާޗް ނުވަވަނަ ދުވަހު ސުޕްރީމް ކޯޓުގެ ހުރުމަތް ކަނޑާލި ކަމަށް ބުނެ ފުއާދުގެ މައްޗަށް ހަ މަސް ދުވަހުގެ ޖަލު ހުކުމއް އިއްވިއެވެ. އެހެންނަމަވެސް ސުޕްރީމް ކޯޓުން ވަނީ އެ ހުކުމް ތަންފީޒުކުރުން ތިން އަހަރަށް ފަސްކޮށްފައެވެ. އަދި އެ ތިން އަހަރުގެ މުއްދަތުގެ ތެރޭގައި އިތުރު ކުށެއް ނުކޮށްފިނަމަ ތިން އަހަރު ހަމަވުމުން ހުކުމް ތަންފީޒުކޮށް ނިމުނީކަމަށްވެސް އޭރު ސުޕްރީމްކޯޓުން އިއްވި ހުކުމުގައިވެއެވެ.
އީސީގެ މެމްބަރު ކަމަށް ފަހުން ފުއާދު އައްޔަންކޮށްފައިވަނީ ރައީސް އިބްރާހިމް މުހައްމަދު ސާލިހްގެ ވެރިކަމުގައި 24 ނޮވެމްބަރު 2019ގައެވެ. އޭގެ ފަހުން މިހާރު ހުންނެވި ކޮމިޝަންގެ ރައީސްކަމަށް ފުއާދު އައްޔަންކުރެއްވީ 2021 ވަނަ އަހަރު އެވެ.
