އެ ކައުންސިލުން ފާސްކޮށް އިއްޔެ ނެރުނު ބަޔާނެއްގައިވަނީ އިޒްރޭލުން ގައްޒާއާ ދެކޮޅަށް ހިންގަމުންދާ ލާއިންސާނީ އަމަލުތައް ކުށްވެރިކޮށްފައެވެ.
އެ ކައުންސިލުން ދައުލަތުގެ ކަމާ ގުޅޭ އިދާރާތަކަށް ގޮވާލާފައިވަނީ ދިވެހިރާއްޖެއަށް އިސްރާއީލުގެ ޕާސްޕޯޓުގައި އެތެރެވުން ހުއްޓުވައިދިނުމަށެވެ.
މަތިވެރިއަށް ފަތުރުވެރިން ގެންނަ ފަރާތްތަކަށް ކައުންސިލުން އިލްތިމާސްކުރީ އިސްރާއީލަށް ނިސްބަތްވާ އެއްވެސް ފަތުރުވެރިޔަކު އެރަށަށް ނުގެނައުމަށްވެސް ވަނީ ގަރާރުގައި އަންގާފައެވެ.
އިސްރާއީލު މީހުން އެރަށަށް އެރުމަކީ ރަށުގެ އަމާންކަމާއި ސުލްހަމަސަލަސްކަމަށް އޮތް ނުރައްކަލެއްގެ ގޮތުގައި ސިފަކުރުމާއެކު، މަތިވެރި ކައުންސިލުން ބުނެފައިވަނީ ފަލަސްތީނުގެ ބިންތައް ފޭރިގަނެ އުފައްދާފައިވާ ޔަހޫދީ ދައުލަތްކަމަށްވާ އިސްރާއީލުގެ ޕާސްޕޯޓު އޮތް އެއްވެސް މީހަކު އެ ރަށަށް އެރުމަކީ ކައުންސިލުން ރުހޭ ކަމެއް ނޫންކަމަށް ގަރާރުގަ ވަނީބުނެފައެވެ.
އެކައުންސިލުން ބުނީ ބޭހާއި ފެނާއި ކަރަންޓުފަދަ ދިރިއުޅުމުގެ ޒަރޫރީ ބޭނުންތަކުން ފަލަސްތީނު ރައްޔިތުން މަހުރޫމުކޮށް، އާއިލާތައް ނިދާފައި ތިއްބައި ޤަތުލުކޮށް، އަމިއްލަ ވަޒަނުގައި ފަލަސްޠީނު ރައްޔިތުން އިސްރާއީލުން ނިކަމެތިކުރަމުދާކަމަށް އެ ކައުންސިލުގެ ގަރާރުގަ ބުނެފައިވެއެވެ.
