މީޑިއާތަކަށް މިއަދު ވާހަކަ ދައްކަވަމުން ޒިޔާއު ވިދާޅާޅުވީ، ޖަލްސާ ބާއްވަން ރާވާފައި އޮތީ ޖުމްހޫރީ މައިދާނުގަ ކަމަށެވެ. ނަމަވެސް މޫސުން ތަން ނުދޭނަމަ ޖަލްސާ ބާއްވާ ލޮކޭޝަން ބަދަލުކުރާނެކަމަށެވެ.
ޒިޔާއު މިހެން ވިދާޅުވެފައިވާއިރު، ރައްޔިތުން މަޖިލީހުގެ މެޖޯރިޓީ ޕާޓީ އެމްޑީޕީ އިން ވަނީ ޑރ. މުއިއްޒު ހުވާކުރުމުގެ ރަސްމިއްޔާތައް ހުރަސްއެޅުމުގެ ރޫހެއް ނެތްކަމަށް މިއަދު ބުނެފައެވެ.
މިއަދު އެމްޑީޕީގެ ޕާލިމެންޓަރީ ގުރޫޕުގެ ލީޑަރު އަސްލަމް ވިދާޅުވީ ހުވާ ކުރުމުގެ ޖަލްސާ ބޭއްވުމަށް ވެސް ނިންމާފައިވަނީ މަޖިލީހުގެ ތަޅުމުން ބޭރުގައިކަމަށެވެ. އެހެންކަމުން މަޖިލިސް ހުއްޓުވަމުން އަންނަގޮތައް އެ ޖަލްސާ ހުއްޓުވަން އެ ބޭފުޅާ ނިސްބަތްވާ އެމްޑީޕީގެ ޕާލިމެންޓަރީ ގުރޫޕުގެ ރޫހެއް ނެތްކަމަށެވެ.
މިއަދު އެމްޑީޕީން އެހެން ބުނި ނަމަވެސް، މިއަދުގެ ޖަލްސާވެސް ކުރިއަށް ނުގެންދެވުނީ މަޖިލީހުގައި އެމްޑީޕީން ހުޅުތާލުކުރުމުންނެވެ. އެމްޑީޕީގެ ކަންބޮޑުވުމަކީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައިގެ ގަރާރެއް އެޕާޓީން ހުށަހަޅާފައިވީނަމަވެސް، މަޖިލީހުގައި އެ ގަރާރުގެ މަސައްކަތްތައް ކުރިއަށް ނުދިއުމެވެ.
މިއަދުގެ ޖަލްސާއަށް އޮތީ ބަޖެޓު ހުށަހެޅުމަށް އެޖެންޑާކޮށްފައެވެ.
އެމްޑީޕީން ބުނެފައިވަނީ މަޖިލީހުގެ ޖަލްސާތައް ދެން ކުރިއަށް ގެންދެވޭނީ ސުޕްރީމް ކޯޓުން އަންގާ ގޮތެއްގެ މަތިންކަމަށެވެ.
