އައިއޭސީން މިއަދު ބުނީ ދިވެހިން އެހީގައި މިއަދު ގާޒާގެ އަލް އަގްސާ މާޓިޔާސް ހޮސްޕިޓަލަށް ތެޔޮ ފޯރުކޮށްދީފައިވާ ކަމަށެވެ.
އެ މައުލޫމާތު ދެމުން އައިއޭސީން ހިއްސާކުރި ވީޑިއޯ މެސެޖެއްގައި އެ ހޮސްޕިޓަލުގެ ކޮމިއުނިކޭޝަންސް ޑިރެކްޓަރު މުހައްމަދު އަލް ޙާޖު ވަނީ ދިވެހިންނަށާއި އައިއޭސީއަށް ޝުކުރު އަދާކުރައްވާފައެވެ.
އައިއޭސީން ތަރުޖަމާކޮށްފައިވާ އެ މެސެޖުގައި އޭނާ ވިދާޅުވީ އޭނާ މެސެޖު ހިއްސާކުރަނީ މިއަދު އަގްސާ މާޓިޔާސް ހޮސްޕިޓަލުން ކަމަށެވެ.
ގާޒާ އަށް އިންސާނީ އެހީ ފޯރުކޮށްދިނުމަށް މިސްރުން ކޮންޓްރޯލް ކުރާ ރަފާހް ބޯޑަރު ހުޅުވާލި ނަމަވެސް އިޒްރޭލުން ވަނީ ގާޒާ އަށް ތެޔޮ އެތެރެކުރުން މަނާކޮށްފަ އެވެ. ތެޔޮ ހުސްވުމުގެ ސަބަބުން މިހާރު ވެސް ގާޒާގެ 35 ހޮސްޕިޓަލުގެ ތެރެއިން 19 ހޮސްޕިޓަލެއް ވަނީ ބަންދުކޮށްފަ އެވެ.
އިޒްރޭލުން ގާޒާ އަށް މިހާރު ދެމުންދާ އަސްކަރީ ހަމަލާތަކުގައި، ފަލަސްތީނުގެ 9200 އަށް ވުރެ ގިނަ މީހުން ޝަހީދުކޮށްލައި 28200 އަށް ވުރެ ގިނަ މީހުން ޒަޚަމްކޮށްލައިފި އެވެ. ޝަހީދުވި މީހުންގެ ތެރޭގައި 3950 އަށް ވުރެ ގިނަ ކުޑަކުދިންނާއި 3290 އަށް ވުރެ ގިނަ އަންހެނުން ހިމެނެ އެވެ.
