ނަސްރުގެ ދުވަހުގެ މުނާސަބަތުގައި ދައުލަތުގެ މީޑިއާއިން ގެނެސްދިން "ދިވެހީންގެރާއްޖެ" ޕްރޮގްރާމުގައި ވާހަކަދައްކަވަމުން ސެމްބެ ފާހަގަކުރެއްވި ގޮތުގައި ރަނިންމޭޓުކަން ހުށަހެޅުއްވި ދުވަހުގެ ކުރީ ރޭ ޒުވާނުން އިސްކުރެއްވުމުގެ ވާހަކަފުޅުތަކެއް ޑރ. މުއިއްޒު އެމަނިކުފާނާ ދެއްކެވި ކަމުގަ އެވެ.
ޖެހިގެން އައި ދުވަހު ސުޕްރީމް ކޯޓުގައި ރައީސް ޔާމީންގެ ޝަރީއަތުގެ އަޑުއެހުމެއް އޮތް ކަމަށާއި އެ އަޑުއެހުން މެދުކަނޑާލި ވަގުތު، ޑރ. މުއިއްޒު އެމަނިކުފާނަށް ރަނިންމޭޓުކަން ހުށަހެޅުއްވީ ކަމަށް ސެމްބެ ވިދާޅުވި އެވެ. އެހެންނަމަވެސް، އެ އަޑުއެހުމާ ގުޅޭގޮތުން އިތުރު ތަފްސީލެއް އެމަނިކުފާނު ނުދެއްވަ އެވެ.
ސެމްބެ ވިދާޅުވީ މުއިއްޒުގެ އެ ހުށަހެޅުމަށް ގޮތެއް ނިންމަން ލިބިވަޑައިިގަތީ ކުޑަ ވަގުތުކޮޅެއް ކަމަށެވެ. އެކަމާ ގުޅޭގޮތުން އެ މަނިކުފާނުގެ ބައްޕަގެ ލަފާ ހޯއްދެވުމަށް ގުޅުއްވި ކަމަށާއި ކުރިއަށް ދިއުމަށް ވިދާޅުވި ކަމަށް ސެމްބެ ފާހަގަކުރެއްވި އެވެ.
ސެމްބެ ވިދާޅުވެފައިވަނީ ރައްޔިތުންގެ މަޖިލިހަށް އެންމެ ފުރަތަމަ އިންތިހާބުވުމާ ހަމައިން ފެށިގެން މުއިއްޒު ދެކެދެނެވަޑައިގެން، ވާހަކަފުޅުދައްކަވަން ފެށުނު ކަމަށެވެ. މަޖިލިހުގެ މަސައްކަތްތަކުގެ ތެރެއިން މުއިއްޒުގެ ފަރާތްޕުޅުން އެހީތެރިކަން ލިބިވަޑައިގެންނެވި ކަމަށް ސެމްބެ ވިދާޅުވި އެވެ. ސެމްބެ ވިދާޅުވި ގޮތުގައި މުއިއްޒާ އެކު މަސައްކަތް ކުރެވޭނެ ކަމުގެ ޔަގީންކަން އޮންނަ ކަމަށާއި އެމަނިކުފާނަށް އިހުލާސްތެރިވެވަޑައިގަންނަވާނެ ކަމުގަ އެވެ.
