މިއަދު ފާހަގަކުރާ ދުނިޔޭގެ ފެނުގެ ދުވަހާ ގުޅިގެން އެމްޑަބްލިއުއެސްސީން ދަނީ ކޮވިޑް-19 އާ މެދު ހޭލުންތެރިކަން އިތުރު ކުރުމަށް މަސައްކަތް ކުރަމުންނެވެ.
އެގޮތުން ވައިރަހުން ރައްކާތެރިވުމަށް ފެން މުހިއްމުއިރު، ފެން އިސްރާފު ނުކުރުމަށް އެ ކުންފުނިން އެދެ އެވެ.
ކޮވިޑް-19 އިން ސަލާމަތްވުމަށް ސިއްހީ މާހިރުން ލަފާދެނީ ރައްކާތެރިކަމާއެކު އަތް ދޮވުމަށެވެ. މިގޮތުން، ތިރީގައިވާ ކަންތަކަށް ސަމާލުކަން ދިނުން މުހިއްމު ކަމަށް އެމްޑަބްލިއުއެސްސީން ބުނެ އެވެ.
- އަތްތިލަ މަދުވެގެން 20 ސިކުންތު ވަންދެން ސައިބޯނި ލައިގެން ރަނގަޅަށް ދޮވުން
- ސައިބޯނިން ދެ އަތް އުނގުޅާއިރު އަތްތިލައިގެ ފަހަތާއި، އިނގިލިތަކުގެ ދޭތެރެއާއި، ނިޔަފަތިތަކުގެ އަޑު ހިމެނުން
- ފެން އިސްރާފު ނުވާ ގޮތަށް އަތްދޮންނަށް އާދަކުރުން
- ސައިބޯނިލައިގެން 20 ސިކުންތު ވަންދެން އަތް އުނގުޅާއިރު، ފެން އިސްކުރު ބަންދުކޮށްފައި ބެހެއްޓުން
- ޖަރާސީމާއި ވައިރަހުން އަތް އިތުރަށް ރައްކާތެރިކުރުމަށްޓަކައި، އަތް ދޮވުމަށްފަހު ޓިޝޫއަކުން ނުވަތަ ސާފު ތުވާއްޔަކުން ރަނގަޅަށް އަތް ހިއްކާލުން
- ސައިބޯންޏާއި އިސްކުރުފެން ނެތް ހާލަތެއްގައި، މަދުވެގެން 50 އިންސައްތަ އަލްކަހޯލް ހިމެނޭ ސެނިޓައިޒަރ އެއް ބޭނުންކުރުން
- މުޅި އަތްތިލައިގެ ހުރިހާ ދިމާލެއް ސެނިޓައިޒް ކުރުމަށްޓަކައި މަދުވެގެން 20 ސިކުންތު އަތް އުނގުޅުން
އެމްޑަބްލިއުއެސްސީން އިތުރަށް ބުނީ އެ ކުންފުނިން އުފައްދާ އިސްކުރު ފެނަކީ ސާފު ރައްކާތެރި ބޯފެނެއް ކަމަށާއި، އެ ފެން އުފައްދަނީ ޑަބްލިއުއެޗްއޯގެ މިންގަނޑުތަކާ އެއް ގޮތަށް ކަމަށެވެ.
އަދި ފެނުގެ ކޮލިޓީ ޗެކް ކުރުމުގެ މަސައްކަތް ކޮންމެ ދުވަހަކު ވެސް ލެބޯޓަރީގައި ގަވާއިދުން ކުރާ ކަމަށް އެމްޑަބްލިއުއެސްސީން ވަނީ ބުނެފަ އެވެ.
