މާލޭ ސިޓީ ކައުންސިލުން އެންމެ ފަހުން ބޭއްވި ޖަލްސާގައި އެ ކަންބޮޑުވުން ފާޅުކުރައްވައި ނަހުލާ ވިދާޅުވީ މައްސަލަ ކައުންސިލުގެ ސަމާލުކަމަށް ގެނައި ފަހުން އެއް ބަގީ ދަތުރުކުރާ ކަމަށެވެ. އެކަމަކު އެ ބަގީންވެސް ގަވާއިދުން ދަތުރުނުކުރާ ކަމަށް ނަހުލާ ވިދާޅުވި އެވެ.
މާލެ ސިޓީ ކައުންސިލުން 390،000 ރުފިޔާ ދީގެން ޕިންކް ސްކައި މޯލްޑިވްސް ނަމަކަށް ކިޔާ ކުންފުންޏަކާ ބަގީގެ ހިދުމަތް ދޭން ހަވާލުކުރީ މިދިޔަ އޭޕްރީލް މަހުގަ އެވެ. އެ ހިދުމަތް ދިނުމަށް 2.9 މިލިއަން ރުފިޔާ ހަރަދުކޮށްގެން 10 ބަގީ ވަނީ ގެނެސްފަ އެވެ.
ހިދުމަތް ނުދޭ ނަމަ، އެ ކުންފުންޏާ މެދު ފިޔަވަޅު އަޅަން ނަހުލާ ވަނީ އެދިވަޑައިގެންފަ އެވެ.
މި މައްސަލަ އާ ގުޅިގެން މާލޭ ސިޓީ ކައުންސިލް ހިންގުމާ ވަގުތީ ގޮތުން ހަވާލުވެޑައިގެން ހުންނެވި ޑެޕިއުޓީ މޭޔަރު އަހުމަދު ނަރީޝް ވިދާޅުވެފައި ވަނީ ބަގީގެ ހިދުމަތް ހުއްޓިފައިވަނީ ބަގީގެ މަރާމާތަށް ކައުންސިލާ އެކު ހަދަން ޖެހޭ އެއްބަސްވުމެއް ނުހެދި ލަސްވާތީ ކަމަށެވެ.
މެއިންޓެނަންސް އެގްރީމެންޓެއް ނުހެދުމަކީ ރައްޔިތުން ބަލަން ބޭނުންވާ ކަމެއް ނޫން ކަމަށާއި އެއީ ހިދުމަތް ނުދެވޭންވީ ސަބަބެއް ނޫން ކަމުގައި ނަހުލާ ވިދާޅުވި އެވެ.
މިކަމާ ގުޅިގެން ވާހަކަ ދައްކަވަމުން ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވިދާޅުވި ގޮތުގައި ކައުންސިލުގެ އިހުމާލަކުން ނޫން ނަމަވެސް ޕަބްލިކް ޓްރާންސްޕޯޓެއް ހުއްޓުމަކީ އެއްވެސް ގޮތަކަށް ބަލައިގަނެވޭނެ ކަމެއް ނޫން ކަމުގަ އެވެ.
ވިލިމާލޭގައި ކުރާ ބަގީ ދަތުރުތަކަށް ސިޓީ ކައުންސިލުން ނަގަނީ ދެ ރުފިޔާ އެވެ. ނަމަވެސް ޕްރައިވެޓް ހަޔާގެ ގޮތުގައި ހަތަރު ސީޓްގެ ބަގީއަކަށް ހަ ރުފިޔާ، ހަ ސީޓްގެ ބަގީއަކަށް 10 ރުފިޔާ އަދި 12 ސީޓްގެ ބަގީއަކަށް 15 ރުފިޔާ ނަގަ އެވެ.
