އެމްޓީސީސީގެ މި އަހަރުގެ ތިންވަނަ ކުއާޓަރުގެ މާލީ ހިސާބުތައް ދައްކާގޮތުން މި އަހަރުގެ ދެވަނަ ކުއާޓަރާ އަޅާބަލާއިރު ތިންވަނަ ކުއާޓަރުގައި އެ ކުންފުންޏަށް ލިބުނު އާމްދަނީ ވަނީ 34 އިންސައްތަ އިތުރުވެފަ އެވެ. ދެވަނަ ކުއާޓަރުގައި އެމްޓީސީސީއަށް އާމްދަނީގެ ގޮތުގައި ލިބިފައިވަނީ 727.1 މިލިއަން ރުފިޔާ އެވެ.
އޮޕަރޭޓިން ޕްރޮފިޓް ނުވަތަ ހިންގުމުގެ ފައިދާގެ ގޮތުގައި މި އަހަރުގެ ތިންވަނަ ކުއާޓަރުގައި އެމްޓީސީސީއަށް 103.7 މިލިއަން ރުފިޔާ ވަނީ ލިބިފަ އެވެ. މިއީ އޭގެ ކުރީ ކުއާޓަރުގައި ހިންގުމުގެ ފައިދާގެ ގޮތުގައި ލިބުނު 96.9 މިލިއަން ރުފިޔާއަށްވުރެ ހަތް އިންސައްތައިގެ އިތުރުވުމެކެވެ.
ތިންވަނަ ކުއާޓަރުގައި ޓެކުހަށް ކެނޑުމުގެ ކުރިން އެ ކުންފުންޏަށް ފައިދާއަށް ލިބިފައި ވަނީ 50.9 މިލިއަން ރުފިޔާ އެވެ. ޓެކުހަށް ކެނޑުމަށްފަހު ފައިދާގެ ގޮތުގައި ލިބުނީ 43.3 މިލިއަން ރުފިޔާ އެވެ.
މި އަހަރުގެ ފުރަތަމަ ކުއާޓަރުގައި ޓެކުހަށް ކެނޑުމަށްފަހު އެމްޓީސީސީއަށް 45 މިލިއަން ރުފިޔާގެ ފައިދާއެއްވެފައިވާއިރު، ދެވަނަ ކުއާޓަރުގައި 41.2 މިލިއަން ރުފިޔާގެ ފައިދާއެއް އެ ކުންފުންޏަށް ވަނީ ވެފަ އެވެ.
