ކަސްޓަމްސްގެ ކޮމިޝަނަރު ޖެނެރަލް ކަމުގައި ހުންނެވި ޝަރީފް ކަސްޓަމްސްގެ ވަޒީފާއިން ރިޓަޔާކުރައްވާފައި ވަނީ 28 އަހަރު ދުވަހުގެ ހިދުމަތަށް ފަހުގަ އެވެ.
ކޮމިޝަނަރު ޖެނެރަލް ކަމުން ޝަރީފް ރިޓަޔާ ކުރެއްވުމާ ގުޅިގެން ކަސްޓަމްސްއިން އެކްސްގައި ކުރި ޕޯސްޓެއްގައި ބުނެފައިވަނީ ޝަރީފުގެ ބެއްލެވުމުގެ ދަށުން ކަސްޓަމްސްއަށް ބޮޑު ކުރިއެރުމެއް ލިބުނު ކަމަށެވެ. އެގޮތުން ޝަރީފުގެ ބެއްލެވުމުގެ ދަށުން އެ ސާވިސްގެ ޕްރޮސީޖާތައް އޮޓޮމޭޓް ކުރެވި، ބޯޑަ ސެކިއުރިޓީ ވަރުގަދަކުރުމާ އެކު އެމްއެމްސީގައި އިންޓެގްރިޓީ ޗެމްޕިއަން ކުރުމަށް އިސްކޮށް މަސައްކަތް ކުރެއްވި ކަމަށް ކަސްޓަމްސްއިން ބުނެ އެވެ.
މީގެ ތިން އަހަރު ދުވަހުގެ ކުރިން ކަސްޓަމްސްގެ ކޮމިޝަނަރު ޖެނެރަލްގެ މަގާމަށް އައްޔަނުކުރި ޝަރީފަކީ އެ ސާވިސްގައި ގިނަ މަގާމުތަކެއް އަދާކުރައްވާފައިވާ ބޭފުޅެކެވެ. އޭނާ ފާހަގަކުރެވިފައިވަނީ އެތަނުގައި މަސައްކަތް ކުރައްވަމުން ކުރި ހޯއްދަވަމުން އައިސް ކޮމިޝަނަރާ ހަމައަށް ވަޑައިގެންނެވި ފުރަތަމަ ކޮމިޝަނަރު ޖެނެރަލްގެ ގޮތުގަ އެވެ. ޝަރީފްގެ ކުރިން އެ މަގާމަށް މީހުން އައްޔަނުކުރަމުން އައިސްފައިވަނީ ސިޔާސީ ގޮތުންނެވެ.
ޝަރީފް މިއަދު ކަސްޓަމްސްއިން ރިޓަޔާ ކުރެއްވިއިރު ހިދުމަތުގެ އަގުވަޒަންކޮށް މި އަހަރު އޭނާއަށް ހަނދާނީ ލިޔުމެއް ވަނީ އަރުވާފަ އެވެ.
