ރައީސް އަބްދުﷲ ޔާމިންގެ ވެރިކަން ނިމުމާއެކު ދިވެހިރާއްޖޭގެ ސިއްހީ ދާއިރާ ފާއިތުވީ ފަސް އަހަރު ދުވަހުގެ ތެރޭގައި ފަހަތަށް ގޮސްފައިވާކަމަށާއި، ސަރުކާރުގެ އެންމެ ބޮޑު ދެ ހޮސްޕިޓަލްކަމަށްވާ ދަރުމަވަންތަ ހޮސްޕިޓަލާއި އައިޖީއެމްއެޗްއާމެދު ކަންބޮޑުވުންތަކެއް އެބަހުރިކަމަށް ރައީސް ޔާމިންގެ ސަރުކާރުގައި ހެލްތު މިނިސްޓަރުކަން ކުރެއްވި، އަބްދުﷲ ނާޒިމް ވިދާޅުވެއްޖެވެ.
Advertisement
ސަންގު ޓީވީގެ ޕްރޮގްރާމެއްގައި ރޭ ވާހަކަ ދައްކަވަމުން ނާޒިމް ވިދާޅުވީ، އިންތިހާބީ ރައީސުލްޖުމްހޫރިއްޔާގެ އޮފީހުން އެކުލަވާލި ކޮމެޓީތަކުން މި ސަރުކާރުން ފާއިތުވީ ފަސް އަހަރު ދުވަހު ރާއްޖޭގެ ސިއްހީހާލަތު ވައްޓާލާފައި އޮތް މިންވަރު މިހާރު ދިރާސާ ކޮށްފައިވާކަމަށެވެ.
"ކަންކަން ކުރިއަށް ނުދޭ މި ދަންނަވަނީ މިސާލަކަށް އައިޖީއެމްއެޗްގަ އިފްރާ ސްރާޗާގެ ގޮތުން ގާއިމްކުރި އެތައް ތަނެއް ނެތިގޮސްފިއޭ ރައްޔިތުން އެބަ ބުނޭ. އަޅުގަނޑުމެން އެންމެ ކަންބޮޑުވާކަމަކީ ދަރުމަވަންތަ ހޮސްޕިޓަލް ފުލް ކެޕޭސިޓީގައި އޭގެ ހިދުމަތްނުކޮށްދެވޭތީ. އޮޕަރޭޝަން ތިއޭޓަރުތައް އަދިވެސް ހުރީ ތަޅުއެޅުވިފައި،"
ކުރީގެ ހެލްތު މިނިސްޓަރު ވިދާޅުވީ ރައީސް ޔާމިންގެ ވެރިކަމުގައި ދަރުމަވަންތަ ހޮސްޕިޓަލް އެޅުނީ ވަރަށް މުހިންމު މަގުސަދެއްގަކަމަށެވެ.
"އެންމެބޮޑު މަގުސަދަކީ ދިވެހިރައްޔިތުން ރާއްޖެއިން ބޭރަށް ގޮސްގެން ބޭސްފަރުވާކުރުން މަދުކުރުން. އޭގެ ސަބަބުން އަޅުގަނޑުމެންގެ އިކޮނޮމީއަށް އެ ލިބިގެންދާ ފުދުންތެރިކަން އޭގެތެރޭގެ ހިމެނޭ،" -އަބްދުﷲ ނާޒިމް-
ނާޒިމް ވިދާޅުވީ ޕީޕީއެމްގެ ސަރުކާރުގައި އައިޖީއެމްއެޗްގައިވެސް ގިނަ ހިދުމަތްތަކެއް ދެން ފެށިކަމަށެވެ. އެގޮތުން ހިތުގެ ބަލިތަކާ ގުޅޭ ސެންޓަރެއްވެސް އުފައްދާފައިވާނެކަމަށެވެ. އަދި ދަރުމަވަންތަ ހޮސްޕިޓަލް ބިނާކުރީ "އޯޕަން ހާޓް" ސާޖަރީތައް ވެސް ކުރެވޭ ފެންވަރަށްކަމަށެވެ. ނަމަވެސް އެއިން އެއްވެސް ކަމެއްވެސް މި ފާއިތުވީ ފަސް އަހަރު ދުވަހު ނުކުރެވުނުކަމަށް ނާޒިމް ވިދާޅުވިއެވެ.
