ސްކޭމް ކޯލުތަކާއި، އޮޅުވާލައިގެން، މަކަރާއި ހީލަތުން މީހުން އަތުން ފައިސާ ހޯދުމުގެ މައްސަލަތައް މުޖްތަމައުގެ ތެރޭގައި ގިނަވެ، އެކަމުގެ ކަންބޮޑުވުން ދައުލަތުގެ އިދާރާތަކާ ހަމައަށް އައިސްފައިވާތީ، އެކަން ހިނގާ ގޮތް ބަލައި، އެކަމުގައި ގާނޫނީ ގޮތުން ފިޔަވަޅު އެޅުމުގައި ހުރި ގޮންޖެހުންތައް ވަޒަންކުރިއިރު، މިކަމުގައި ދައުލަތުގެ އިދާރާތަކުން އަމަލުކުރަންޖެހޭ ގޮތުގެ އިރުޝާދެއް އޮތުމުގެ މުހިންމުކަން އޮތްކަމަށް ޕްރޮސިކިއުޓަރ ޖެނެރަލަށް ފެނިވަޑައިގެންނަވާތީ ކަމަށް ޕީޖީ އޮފީހުން ބުންޏެވެ.
މި އިރުޝާދު ޕީޖީ އޮފީހުން ދިނީ، ޕްރޮސިކިއުޓަރ ޖެނެރަލްގެ ގާނޫނުގެ ދަށުން، ޖިނާއީ ކުށެއް ކަމަށް ތުހުމަތުކުރެވޭ ޢަމަލުތަކާ ގުޅިގެން ބަލާ ބެލުންތަކާއި، ހިންގާ ތަހުގީގުތައް ބަލައި އެކަންކަން ހިންގަނީ ގާނޫނާ އެއްގޮތަށްތޯ ބެލުމުގެ ޒިންމާގެ ދަށުން، ސްކޭމްގެ މައްސަލަތައް ތަހުގީގުކުރުމުގައާއި ދައުވާކުރުމުގައި އެއް ގޮތަކަށް އަމަލުކުރުމަށް ބާރު އެޅުމަށެވެ. އަދި، އެފަދަ މައްސަލަތައް ތަހުގީގުކުރުމުގައި ފުރިހަމަކުރަންވީ ކަންކަން އެއް ހަމައަކުން ފުރިހަމަކުރުމަށް މަގުފަހިކޮށްދިނުމަށްޓަކައި އެކުލަވާލާފައިވާ "ސްކޭމް ކޯލްތަކާއި އެހެނިހެން ވަސީލަތްތައް ބޭނުންކޮށްގެން އޮޅުވާލައިގެން ފައިސާ ހޯދާ މައްސަލަތައް ތަހުގީގުކުރުމުގައާއި، ދައުވާކުރުމުގައި އަމަލުކުރާނެ ގޮތުގެ އިރުޝާދު" އެއް މިއަދު ނެރުއްވައި، ހުރިހާ ތަހުގީގީ އިދާރާތަކަށް ފޮނުއްވާފައިވާނެ ކަމަށް ޕީޖީ އޮފީހުން ބުންޏެވެ.
މިއިރުޝާދާ އެއްގޮތަށް އަމަލުކުރަން ފެށުމުން، ސްކޭމް ކޯލްތަކާގުޅޭ މައްސަލަތަކުގެ ތަހުގީގުތައް އަވަސްވެ، ކާމިޔާބުކަމާއެކު ޕްރޮސިކިއުޓް ކުރުމަށް ބާރު އެޅޭނެކަމަށް ޕީޖީ އޮފީހުން ގަބޫލު ކުރެއެވެ.
ޕީޖީ އޮފީހުން އިތުރަށް ބުނީ، މިބާވަތުގެ މައްސަލަތައް ތަހުގީގުކުރުމުގައި އިދާރާތަކުން ހޯދަންޖެހޭ މައުލޫމާތުތައް ހޯދުމުގައި ކަމާބެހޭ ހިދުމަތް ފޯރުކޮށްދޭ ތަންތަނުން ކުރިމަތިވާ ގޮންޖެހުންތަކަށް ހައްލު ހޯދުމުގެ މަސައްކަތްތަކެއްވެސް މިހާރު މިދަނީ ކުރަމުން ކަމަށެވެ. މޯބައިލް ފޯނުގެ ހިދުމަތްދޭ ތަންތަނާއި ބޭންކުތަކާއި، އެނޫންވެސް މާލީ މުއާމަލާތްތައް ހިންގާ ތަންތަނުން، އެކަށީގެންވާ މުއްދަތެއްގެ ތެރޭގައި ތަހުގީގަށް ބޭނުންވާ މައުލޫމާތު ލިބިގެން މެނުވީ، މިބާވަތުގެ މައްސަލަތައް ކާމިޔާބުކުރުން ވާނީ ދަތި ކަމަކަށް ކަމަށް ޕީޖީ އޮފީހުން ބުންޏެވެ.
