ޓްރާންސްޕެރެންސީ އިން މިއަދު ނެރުނު ބަޔާނެއްގައި ބުނީ ރައީސް އިބްރާހީމް މުހައްމަދު ސޯލިހުގެ ދައުރު ހަމަވާން ހަތަރު ދުވަހަށްވެފައި އޮއްވާ އަދީބާއި ޒިޔަތު، މާފުދެއްވުން ކުށްވެރިކުރާކަމަށެވެ.
މިއީ ހަމައެކަނި ރައީސްގެ އޮންނަ މާފުދެއްވުމާއި ހުކުމް ލުއިކުރުމުގެ ބާރުގެ ބޭނުން ނަހަމަގޮތުގައި ހިފުން ނޫން ކަމަށާއި، މިއީ ބާރާއި ނުފޫޒުގެ މަގާމުތައް ނަހަމަ ގޮތުގައި ބޭނުންކުރާ ސިޔާސީ ފަރާތްތަކަށް ލިބޭ ހިމާޔަތާއި އަދަބު ނުލިބުމާއި އިމްތިޔާޒު ދައްކުވައިދޭ ކަމެއް ގޮތުގައި ޓްރާންސްޕެރެންސީން ސިފަކުރެއެވެ.
"ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގަތީ 2018 ވަނަ އަހަރު ކޮރަޕްޝަނަށް ޒީރޯ ޓޮލަރެންސް ވައުދުވެވަޑައިގެންނެވެ. ވޭތުވެދިޔަ ފަސް އަހަރު ތެރޭގައި އަޅުގަނޑުމެންނަށް ތަކުރާރުކޮށް ފެނިފައިވަނީ ކޮރަޕްޝަނަށް ފެހި އަލިކަން ލިބި، ކޮރަޕްޝަންގެ ހަރަކާތްތަކުގައި ބައިވެރިވާ މީހުންނަށް ރައްކާތެރިކަން ލިބިގެންދާތަން." ބަޔާނުގައި ބުނެއެވެ.
ޓްރާންސްޕެރެންސީ އިން ވަނީ މިދިޔަ ފަސް އަހަރުތެރޭ ބޮޑެތި ކޮރަޕްޝަނަށް މަގުފަހިކޮށްދީ ރައްކާތެރިކޮށްދިން ގާނޫނުތަކާއި ގަވާއިދުތަކާއި އުސޫލުތަކުގެ ތެރޭގައި ހުރި ނިޒާމީ މުހިންމު ފަރަގުތައް ހައްލުކުރުމަށް މާބޮޑު މަސައްކަތެއް ކުރެވިފައިނުވާކަން ފާހަގަކޮށްފައެވެ.
