މަޖިލީހުގެ ރައީސްގެ މަގާމުން ނަޝީދު އިއްޔެ އިސްތިއުފާ ދެއްވުމުން، އެ މަގާމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ރޭ އިންތިހާބުކޮށްފައިވާ އިރު، މަޖިލީހުގެ މިއަދުގެ ޖަލްސާގައި އޮތީވެސް ބަޖެޓް މައްސަލައެވެ. ބަޖެޓް ހުށަހަޅުއްވަން ފެށިއްސުރެ، ޑިމޮކްރެޓްސްއިން ދިޔައީ މަޖިލީހުގެ ތަޅުމުގައި އަޑުގަދަކޮށް ނިޒާމް ގެއްލުވާލަމުންނެވެ.
އަމީރު މަޖިލީހަށް ވަޑައިގެން ޖަލްސާ ފެއްޓެވުމާ އެކު މެދު ހެންވޭރު ދާއިރާގެ މެމްބަރު އަދި މައިނޯރިޓީ ލީޑަރު އަލީ އާޒިމް ނިޒާމީ ނުކުތާއެއް ނަންގަވައި ވިދާޅުވީ ދެން އަންނަ އަހަރެއްގެ ދައުލަތުގެ ބަޖެޓު ހިނގާ އަހަރުގެ ނޮވެމްބަރު 1 ވަނަ ދުވަހުގެ ކުރިން ފިނޭންސް މިނިސްޓަރު ހުށަހަޅުއްވަންޖެހޭނެ ކަމަށް މާލިއްޔަތު ގާނޫނާއި މަޖިލީހުގެ ގަވާއިދުގައި ބަޔާންކޮށްފައިވާ ކަމަށެވެ.
ނަމަވެސް، އެކަން ކުރަން މަޖިލީހުގެ ޖަލްސާއެއް ތާވަލުކޮށްފައިވާ ޖަލްސާއަށް އަމީރު ވަޑައިނުގެންނެވީ ގޯސްކޮށް ކަމަށް ސުޕްރީމް ކޯޓުގެ ހުކުމުން ވެސް ކަނޑައަޅާފައިވާ ކަމަށް ވިދާޅުވެ، އާޒިމް ވަނީ އެ ނިޒާމީ މައްސަލަ ބަލައިގަތުމަށް ގޮވާލައްވައިފަ އެވެ.
އެއީ ނިޒާމީ ނުކުތާއެއް ނޫން ކަމަށް ރިޔާސަތުން އަސްލަމް ނިންމެވުމުން، ނަޝީދު ވެސް ވަނީ ނިޒާމީ ނުކުތާއެއް ނަންގަވައި، މަޖިލީހުގެ ހިންގުމަށް އަމީރު ފާޅުގައި ގޮންޖައްސަވާފައިވާ ކަމަށް ވިދާޅުވެފަ އެވެ.
ބަޖެޓު ހުށަހަޅަން އަމީރު ފެއްޓެވުމާ އެކު، ޑިމޮކްރެޓްސްގެ މެމްބަރުން ވަނީ ކޮޅަށް ތެދުވަޑައިގެން އަޑު ގަދައްކުރައްވައި، ހުރަސްއަޅަން މަސައްކަތް ކުރައްވައިފަ އެވެ. އަދި އަމީރު އިންނެވި މޭޒު ކައިރިއަށް އާޒިމް ވަޑައިގެންނެވުމުން، އަމީރުގެ ހިމާޔަތުގައި އެމްޑީޕީގެ މެމްބަރުން ވެސް ވަނީ އެ މޭޒު ވަށާލައިފަ އެވެ.
އަމީރު ފަހަތުގައި ތިއްބަވައިގެން ބައެއް މެމްބަރުން އަޑުގަދަކުރައްވަމުން ގެންދެވި ނަމަވެސް، އޭނާ ވަނީ ބަޖެޓު ހުށަހަޅުއްވައިފަ އެވެ.
މިއަދުގެ ޖަލްސާ ނިންމާނީ، މިއަހަރުގެ ބާކީ ބަޔަށް ހުށަހެޅި ސަޕްލިމެންޓަރީ ބަޖެޓުގެ ބަހުސް މާދަމާ ކުރިއަށް ގެންދަން ފާސްކޮށްފައެވެ.
