ރައީސް މި ގޮތަށް ނިންމަވާފައި ވަނީ މިއަދު ބޭއްވެވި ވަޒީރުންގެ މަޖިލިހުގެ ޖަލްސާގައި އެކަމާ ގުޅޭގޮތުން އެންވަޔަރަންމެންޓް މިނިސްޓްރީން ހުށަހެޅުއްވި ކަރުދާހަށް ވަޒީރުންގެ މެދުގައި މަޝްވަރާ ކުރެއްވުމަށް ފަހުގަ އެވެ.
މި މުއާހަދާއަކީ ގައުމުތަކުގެ އިހުތިސޯސްއިން ބޭރުގައި އޮންނަ މާކަނޑުގެ ސަރަހައްދުތަކަށް މާހައުލީ ގޮތުން ވަކި އުސޫލުތަކެއް ކަނޑައެޅުމާ ގުޅޭ މުއާހަދާއެކެވެ. މި މުއާހަދާގައި މައިގަނޑު ހަތަރު ބައެއް ހިމެނެ އެވެ.
ބިޔޯންޑް ނޭޝަނަލް ޖުރިސްޑިކްޝަން (ބީބީއެންޖޭ) އެކުލަވާލުމަކީ މާކަނޑުގެ މާހައުލީ ނިޒާމުތައް ރައްކާތެރިކޮށް ހިމާޔަތް ކުރުމަށް މިހާތަނަށް ބައިނަލްއަގުވާމީ ގޮތުން ކުރެވުނު އެންމެ މުހިންމު މަސައްކަތެވެ. އެންވަޔަރަންމެންޓް މިނިސްޓްރީން ބުނެފައި ވަނީ ކަނޑުގެ ސަރަހައްދުތައް ހިމާޔަތް ކުރުމާއި ދެމެހެއްޓެނިވި ގޮތުގައި ބޭނުން ކުރުން މަގުފަހިކުރުވާ މިފަދަ މުއާހަދާއެއްގައި ރާއްޖެ ފަދަ ކުޑަ ޖަޒީރާ ގައުމަކުން ބައިވެރިވުމަކީ ވަރަށް މުހިންމު ކަމެއް ކަމަށެވެ.
މިހާތަނަށް ދުނިޔޭގެ 83 ގައުމަކުން ވަނީ ބިޔޯންޑް ނޭޝަނަލް ޖުރިސްޑިކްޝަން، (ބީބީއެންޖޭ) މުއާހަދާގައި ސޮއިކޮށްފަ އެވެ.
