ފެނަކައިގެ މެނޭޖިން ޑިރެކްޓަރުގެ މަގާމުން ސައީދު އިސްތިއުފާ ދެއްވާފައިވާކަން "ސީއެންއެމް" އަށް އިތުބާރުހުރި މަސްދަރަކުން ވަނީ ކަށަވަރުވެފަ އެވެ. އެހެންނަމަވެސް އޭނާގެ ބަހެއް ލިބިފައިނުވާތީ އިސްތިއުފާ ދެއްވި ސަބަބެއް އަދި ނޭނގެ އެވެ.
ސައީދު މެނޭޖިން ޑިރެކްޓަރުގެ މަގާމުން އިސްތިއުފާ ދެއްވާފައިވާއިރު، ފެނަކަ އާ ގުޅޭގޮތުން 75 މައްސަލައެއް އެންޓި ކޮރަޕްޝަން ކޮމިޝަން (އޭސީސީ) ދަނީ ތަހުގީގު ކުރަމުންނެވެ. ފެނަކަ އާ ގުޅުންހުރި މައްސަލަތަަކުގައި އެ ކުންފުންޏަށް ފިޔަވަޅު އެޅުމަށް އޭސީސީން ރައީސް އޮފީހަށް އެންގި ނަމަވެސް އެ ކުންފުންޏަށް އެއްވެސް ފިޔަވަޅެއް އެޅި ކަމެއް އެނގިފައެއް ނުވެ އެވެ.
ސަރުކާރު ކުންފުނިތަކުގެ ދަރަނި ވަރަށް ބޮޑަށް އިތުރުވެފައިވާއިރު، ފެނަކައަކީ އެންމެ ބޮޑު ދަރަންޏެއް އޮތް އެއް ކުންފުންޏެވެ. އެ ކުންފުނީގެ ދަރަނި ބިލިއަނަކަށް ވުރެ އިތުރެވެ.
އަންނަ ހުކުރު ދުވަހު ފަށާ ރިޔާސީ އާ ދައުރާ އެކު ގިނަ ކުންފުނިތަކުގެ ވެރިންގެ މަގާމުތައް ބަދަލުވާނެ އެވެ.
