ފުލުހުން ބުނިގޮތުގައި ފުލުހުންގެ ބަންދުގައި ތިބޭ މީހުންގެ ބަންދާ މެދު ގޮތެއް ނިންމުމަށް ބާއްވާ އަޑުއެހުން ވީޑިއޯ ކޯލް ކޮންފަރެންސް މެދުވެރިކޮށް ކުރިއަށްގެންދަން ނިންމީ ސިއްހީ ކުއްލި ނުރައްކަލުގެ ހާލަތު އިއުލާނުކޮށްފައި އޮތުމާ ގުޅިގެން އަޅާ ފިޔަވަޅެއްގެ ގޮތުގަ އެވެ.
ކްރިމިނަލް ކޯޓާ ފުލުހުންގެ އިދާރާއާ ދެމެދު ވީޑިއޯ ކޮލް ކޮންފަރެންސް މެދުވެރިކޮށް މުއްދަތު ޖެހުމަށް ބާއްވާ އަޑުއެހުންތައް ކުރިއަށްގެންދިއުމަށް ފުރިހަމަ ކުރަންޖެހޭ އިންތިޒާމުތައް ނިންމާފައިވާކަމަށް ފުލުހުން ބުނެ އެވެ.
ފުލުހުން ބުނީ ވީޑިއޯ ކޮންފަރެންސް މެދުވެރިކޮށް މުއްދަތު ޖެހުމުގެ މަޖިލިސް ކުރިއަށްގެންދިޔަ ނަމަވެސް ބަންދުގައި ހުރި މީހާގެ ގާނޫނީ ވަކީލަށް ބައިވެރިވެވޭނެ އިންތިޒާމް ހަމަޖައްސާފައިވާ ކަމަށެވެ.
މުއްދަތު ޖެހުމަށް ބާއްވާ އަޑުއެހުންތައް ވީޑިއޯ ކޮންފަރެންސް މެދުވެރިކޮށް ކުރިއަށްގެންދަން ފުލުހުން ނިންމިއިރު، މިމަހުގެ 17 ވަނަ ދުވަހު ސުޕްރިމް ކޯޓުން ވަނީ ކޮރޯނާ ވައިރަހާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން، އޯޑިއޯ ނުވަތަ ވީޑިއޯ ކޮންފަރެންސްކޮށް ޝަރީއަތް ކުރިއަށް ގެންދެވޭނެ އިންތިޒާމް ހަމަޖެހިފައިވާ ކޯޓުތަކުން އެގޮތަށް ޝަރީއަތްތައް ކުރިއަށް ގެންދިއުމަށް އަންގާފަ އެވެ.
