އާ ރައީސް ޑރ. މުހައްމަދު މުއިއްޒުގެ ސަރުކާރު މިދިޔަ ހުކުރު ދުވަހު އެކުލަވާލައި 22 މިނިސްޓްރީއެއް ވަނީ އުފައްދައިފަ އެވެ.
ރައީސް އޮފީހުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި އެ އޮފީހުގެ ޕަބްލިކް ޕޮލިސީ އަންޑަސެކްރެޓަރީ މުހައްމަދު ފިރުޒުލް ވިދާޅުވީ މިއަދު މިދެކޭ ގާނޫނުއަސާސީގެ ރޫހަކީ ޖަވާބުދާރީ ކުރުވަނިވި، ޖަވާބުދާރީވަނިވި ސަރުކާރެއް ބައްޓަންކުރުން ކަމަށާއި އެ ނިޒާމުގެ ތެރެއިން އެކަން ކުރިއަށްދާނެ ކަމަށެވެ.
ފިރުޒުލް ވިދާޅުވީ ވަޒީރުންގެ މަޖިލީހަށް އައްޔަން ކުރެއްވި ބޭފުޅުންނާއި އެހެން މަގާމުތަކަށް އައްޔަން ކުރައްވާ ބޭފުޅުނަށް ވެސް އެމަނިކުފާނުގެ ފުރިހަމަ ޔަގީންކަން އެބަ އޮތް ކަމަށެވެ. ރައީސް މުއިއްޒު އެ މަގާމުތަކަށް އެ ބޭފުޅުން އައްޔަންކުރެއްވީ ވެސް ފުރިހަމަ ޔަގީންކަމާއި އިތުބާރު އޮވެގެން ކަމަށް ވިދާޅުވި އެވެ.
ނަމަވެސް އެބޭފުޅުންގެ މަސައްކަތުގެ ރޭޓާ މެދު މައްސަލައެއް އުޅޭ ނަމަ، އެކަން ރިވިއު ކުރާނެ ކަމަށް ފިރުޒުލް ތަކުރާރުކޮށް ވިދާޅުވި އެވެ.
ރައީސް މުއިއްޒުގެ ކެބިނެޓުގައި ޖުމްލަ 22 ބޭފުޅަކު ހިމެނިވަޑައިގަންނަވަ އެވެ. އެއީ:
1. މިނިސްޓްރީ އޮފް ޑިފެންސް - ދިފާއީ ވުޒާރާ
2. މިނިސްޓްރީ އޮފް ފޮރިން އެފެއާޒް - ހާރިޖީ ވުޒާރާ
3. މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ - ދާހިލީ ސަލާމަތާއި ފަންނިއްޔާތާ ބެހޭ ވުޒާރާ
4. މިނިސްޓްރީ އޮފް ފިނޭންސް - މާލީ ވުޒާރާ
5. މިނިސްޓްރީ އޮފް އެޑިޔުކޭޝަން - ތައުލީމީ ވުޒާރާ
6. މިނިސްޓްރީ އޮފް ހެލްތް - ސިއްހީ ވުޒާރާ
7. މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް - އިގްތިސޯދީ ތަރައްގީއާއި ވިޔަފާރިއާ ބެހޭ ވުޒާރާ
8. މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް - މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާ
9. އެޓާނީ ޖެނެރަލްގެ އޮފީސް - ބަންޑާރަ ނައިބުގެ އޮފީސް
10. މިނިސްޓްރީ އޮފް އިސްލާމިކް އެފެއާޒް - އިސްލާމީކަންތައްތަކާ ބެހޭ ވުޒާރާ
11. މިނިސްޓްރީ އޮފް ޓޫރިޒަމް - ފަތުރުވެރިކަމާ ބެހޭ ވުޒާރާ
12. މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް - އިޖުތިމާއީ އަދި އާއިލީ ތަރައްގީއާ ބެހޭ ވުޒާރާ
13. މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަން - ކުޅިވަރާއި ހަށިހެޔޮކަމާ ބެހޭ ވުޒާރާ
14. މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ - މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާ
15. މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓް- ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާ
16. މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން - ދަތުރުފަތުރާއި މަދަނީ އުދުހުންތަކާ ބެހޭ ވުޒާރާ
17. މިނިސްޓްރީ އޮފް ދިވެހި ލެންގުއޭޖް، ކަލްޗާ އެންޑް ހެރިޓޭޖް - ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
18. މިނިސްޓްރީ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓް - މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާ
19. މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ- އިމާރާތްކުރުމާއި ބިނާރާ ބެހޭ ވުޒާރާ
20. މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއާ - ދަނޑުވެރިކަމާއި ދިރޭތަކެއްޗާ ބެހޭ ވުޒާރާ
21. މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް - ޒުވާނުން ބާރުވެރިކުރުވުމާއި، މައުލޫމާތާއި ފަންނާ ބެހޭ ވުޒާރާ
22. މިނިސްޓްރީ އޮފް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް - ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާ.
މާފަންނު ގަޑިބުރު ޒަމާނީކޮށް ހުޅުވުމަށް ރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވެފައި ވަނީ އާ ސަރުކާރުގެ އެކި ވުޒާރާތަކުގެ މަސައްކަތްތައް ރަސްމީކޮށް ފެށިގެން ދާއިރު، މީގެ ކުރިން ލަހުން ކުރިއަށް ދިޔަ މަސައްކަތްތައް ބާރު ސްޕީޑަށް ބަދަލު ވެގެން ދާނެ ކަމަށެވެ. އަދި ވިދާޅުވީ ހުރިހާ ވަޒީރުން އެ ތިއްބެވީ ކެތްމަދުވެފައި ކަމަށާއި ރައްޔިތުންނަށްޓަކައި ހިދުމަތް ކުރުމަށްޓަކައި ރެޔާއި ދުވާލު ވަޒީރުން މަސައްކަތް ކުރަމުން ދާނނެ ކަމަށެވެ.
