ދިވެހިންނަށް އިމުގާ ފޯމް ފުރަން ނުޖެހޭ ގޮތަށް ހެދީ، އިމިގްރޭޝަންގެ ކޮންޓްރޯލާ ޖެނެރަލްގެ މަގާމާ އިއްޔެ ހަވާލުވެވަޑައިގެންނެވި މުހައްމަދު ޝަމްއާން ވަހީދުއެވެ. މިކަން ހާމަކޮށް، އިމިގްރޭޝަނުން ނެރުނު ނޫސްބަޔާނެއްގައި ބުނީ ޝަމްއާން ރަސްމީކޮށް މިއަދު ވަޒީފާގެ މަސްއޫލިއްޔަތުތަކާ ހަވާލުވެވަޑައިގެން އެންމެ ފުރަތަމަ ވެސް ވަނީ އާންމުންނަށް ލުއިފަސޭހަ ހިދުމަތެއް ފޯރުކޮށްދިނުމުގެ މަސައްކަތް ފައްޓަވާފައި ކަމަށެވެ. އިމުގާ ފޯމު ފުރުން ހުއްޓާލަން އޭނާ ނިންމެވީ އެގޮތުން މަތިން ކަމަށް އެ ބަޔާނުގައި ބުންޏެވެ.

މީގެ ކުރިން އޮންނަ ގޮތުން، ރާއްޖެ އަށް އަންނަ އަދި ރާއްޖެއިން ބޭރަށް ދާ ދިވެހިންގެ އިތުރުން ބިދޭސީންނާއި ޓޫރިސްޓުންނަށް ވެސް މި ފޯމު ފުރަން ޖެހެ އެވެ. ދިވެހިންނަށް މި ފޯމު ފުރަން ނުޖެހޭ ގޮތަށް ހެދި ނަމަވެސް ބިދޭސީންނާއި ޓޫރިސްޓުން އަދިވެސް މި ފޯމު ފުރަން ޖެހޭނެ އެވެ. އިމުގާ ފޯމު ތައާރަފުކުރީ ކޮވިޑް-19 އާ ގުޅިގެން ރާއްޖޭގެ ބޯޑަރުގެ ހިދުމަތް ހަރުދަނާކޮށް ރައްކާތެރިކުރުމުގެ ގޮތުން ޖުލައި 15، 2020 ގަ އެވެ. އަދި މާޗު 14، 2021 އިން ފެށިގެން މި ފޯމު އޮންލައިންކޮށް ފުރޭނެ އިންތިޒާމު ހަމަޖެއްސި އެވެ.