ކޮންމެ ފްލެޓަކަށް 200،000 ރުފިޔާ ދޭން ބަޖެޓް ކޮމިޓީ އޮތީ ތައްޔާރަށް ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ، އެމްޑީޕީ މެންބަރު ޔައުގޫބް އަބްދުﷲ ވިދާޅުވެއްޖެއެވެ.
ކޮންމެ ފްލެޓަކަށް 200،000 ރުފިޔާ ދޭން ބަޖެޓް ކޮމިޓީ އޮތީ ތައްޔާރަށް ކަމަށް ދާންދޫ ދާއިރާގެ، މެންބަރު ޔައުގޫބް ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި، އަންނަ އަހަރުގެ ބަޖެޓާ ގުޅޭ ގޮތުން ދެއްކެވި ވާހަކައިގައެވެ.
ރިޔާސީ އިންތިހާބުގެ ކެމްޕެއިންގައި، ހިޔާ ފްލެޓުތަކުގެ ފިނިޝިން ނިންމަން ކުރި ހަރަދުން 200000 ރުފިޔާ އަނބުރާ ދޭނެ ކަމަށް ޑރ. މުހައްމަދު މުއިއްޒުވަނީ ވިދާޅުވެފައެވެ. މުއިއްޒުގެ އެ ވާހަކައަށް އިޝާރާތް ކުރައްވައި ޔައުގޫބް ވިދާޅުވީ، އެ ފައިސާ ބަޖެޓްގައި ހިމަނައިދޭން އެމްޑީޕީ އޮތީ ތައްޔާރަށް ކަމަށެވެ.
ކޮންމެ ފްލެޓަކަށް ތިމަންނަ ދެ ލައްކަ ރުފިޔާ ދޭނަމޭ، 7000 ފްލެޓަށް، ކޮންމެ ފްލެޓަކަށް ތިމަންނަ ދެ ލައްކަ ރުފިޔާ ދޭނަމޭ، އެ ވާހަކަވެސް އަޅުގަނޑު ސާފު ކުރިން. އެއީ ބަޖެޓް ކޮމިޓީގައި އަޅުގަނޑު އިންނާތީ އެކަން އެގޮތުގައި ހިމަނައިދިނުމަށް. އަޅުގަނޑުމެން ބަޖެޓް ކޮމިޓީން މިއޮތީ ތައްޔާރަށް އެކަން ކޮށްދޭން. އެމްޑީޕީގެ މެޖޯރިޓީ އޮތް އެމްޑީޕީގެ މެންބަރުން މި އޮތީ ތައްޔާރަށް އެކަން ކޮށްދޭން. ފިނޭންސް މިނިސްޓަރު ވިދާޅުވީ ނޫނެކޭ ތިކަމެއް ނުވާނޭ. އެއީ ސިޔާސީ ވާހަކައޭ.
ހިޔާ ފްލެޓުތަކުގެ ފިނިޝިން ނިންމަން ކުރި ހަރަދުން 200000 ރުފިޔާ އަނބުރާ ދޭނެ ކަމަށް އިދިކޮޅު ކެންޑިޑޭޓު ޑރ.މުހައްމަދު މުއިއްޒު ވިދާޅުވީ ކެމްޕެއިން ތެރޭގައެވެ. މުއިއްޒު ވިދާޅުވީ ހިޔާ ފުލެޓުތައް ބައެއް ފަރާތްތަކުން ވަރަށް އަގުބޮޑުކޮށް ހަދާފައިވާ ކަމަށެވެ. ނަމަވެސް ޖުމްލަކޮށް ހެދުމުން ފުލެޓެއް ހަދަން ދާނެ ކަމަށް ބެލެވެނީ 200000 ރުފިޔާ ކަމަށާއި އެ އަދަދު ދެއްވާނެ ކަމަށެވެ.
"އެވްރެޖް ގޮތެއްގައި އެ ދިޔަ ހަރަދަށް ބަލާފައި އާބަންކޯއިން އެ ކޯސްޓް އޮރިޖިނަލީ ޕްލޭން ކުރި ގޮތަށް، އެ ކޯސްޓް ބެއާކުރާ ގޮތަށް މި ކުރެވުނު ހަރަދު އެވްރެޖްކޮށްފައި އަނބުރާ ދައްކާގޮތަށް. އޭރު ޖެހުނު ހިސާބަށް ބަލާފައި ހަމަ އެ އަދަދަށް އެޗްޑީސީން ލޯނެއް ނަގާފައި ރައްޔިތުން އަތުން ދިޔަ އަދަދު އެވްރެޖް ކޮށްފައި ވަކި އަދަދެއް ކަނޑައަޅާފައި ދޭނަން،" މުއިއްޒު ވިދާޅުވިއެވެ.
