ހޯމް މިނިސްޓްރީން ކޮށްފައިވާ ޓްވީޓެއްގައި ބުނެފައިވަނި، ރާއްޖޭގައި އެންމެ ފުރަތަމަ ޝަހީދުންގެ ދުވަސް ފާހަގަކޮށްފައިވަނީ އެކެއް ޝައުބާން 1400 ގައި ކަމަށެވެ. އަދި މިމަހުގެ 25 ވާ ބުދަ ދުވަހަކީ ޝަހީދުންގެ ދުވަސްކަމަށާއި، އެހެން ނަމަވެސް ކޮވިޑް19ގެ ސަބަބުން ޝަހީދުންގެ ދުވަހުގެ ރަސްމީ ޖަލްސާ ނުބޭއްވުމަށް ނިންމާފައިވާކަމަށް ހޯމް މިނިސްޓްރީން ބުނެ އެވެ.
ރާއްޖޭގައި އެންމެ ފުރަތަމަ ޝަހީދުންގެ ދުވަސް ފާހަގަކޮށްފައިވަނީ 14 ޖޫން 1980 (01 ޝައުބާން 1400)ގަ އެވެ.
ޝަހީދުންގެ ދުވަސް ފާހަގަކުރަނީ ގައުމަށްޓަކައި ޝަހީދުވެ ގޮސްފައިވާ ޤައުމީ އަބްތާލުންގެ ހިދުމަތްތަކުގެ ހަނދާންކޮށް އެ އަބްތާލުންގެ ޒިކުރާ އާލާކުރުމަށެވެ. މިދުވަސް ނިސްބަތްވެގެންވަނީ އިސްލާމްދީނާއި ޤައުމުގެ ދިފާއުގައި ޕޯޗްގީޒުންނާ ހަނގުރާމަ ކުރައްވައި އަލީ ރަސްގެފާނު ޝަހީދުވެވަޑައިގެންނެވި ދުވަހަށެވެ.
ޝަހީދުންގެ ދުވަސް ފާހަގަކުރުމަށް ބާއްވާ ރަސްމީ ޖަލްސާ މި ފަހަރު ކެންސަލް ކުރި އިރު ރާއްޖެ އަށާއި މުޅި ދުނިޔެ އަށް ވަނީ ކޮވިޑް-19 ނުރައްކާ ބޮޑުވެފައެވެ. އެބަލިން ރައްކާތެރިވުމުގެގޮތުން ގައުމުތަކުން ދަނީ ތަފާތު ފިޔަވަޅުތައް އަޅަމުންނެވެ.
އެ ބަލިން ރައްކާތެރިވުމުގެގޮތުން އެޅޭނެ އެންމެ މުހިންމު ފިޔަވަޅެއްގެ ގޮތުން ސިއްހީމާހިރުން ލަފާ ދެމުންދަނީ ބޭރަށް ނުނިކުމެ ގޭގައި ތިބުމަށެވެ. ސަބަބަކީ އެބަލި ޖެހިފައިވަނީ ކާކަށް ކަމެއް ނޭނގުމުުގެ ސަބަބުން ބަލި ފެތުރުން އަވަސް ވާތީ އެވެ.
ކޮވިޑް-19 އަށް ރާއްޖެއިން 13 މީހަކަށް ޖެހިފައިވާ އިރު މިހާރުވަނީ ފަސް މީހުން އެބަލިން ރަނގަޅުވެފަ އެވެ.
