ރައްޔިތުންގެ މަޖިލީހުގެ ފެލިދޫ ދާއިރާގެ މެންބަރު ކަމުން އިސްތިއުފާ ދެއްވައި، އާބަންކޯގެ މެނޭޖިން ޑިރެކްޓަރުކަމުގެ މަގާމާ މިއަދު ހަވާލުވެވަޑައިގެންނެވި ފަޒުލް މިހެން ވިދާޅުވީ މިރޭ ސޯޝަލް މީޑިއާގައެވެ.
ހިޔާ ފްލެޓް ހަދަން ހަރަދު ކުރި ފައިސާ އަނބުރާ ލިބޭނެ ކަމަށް އާބަންކޯގެ އާ މެނޭޖިން ޑިރެކްޓަރު ފަޒުލް މިރޭ ވިދާޅުވިއިރު، ކޮންމެ ފްލެޓަކަށް 200،000 ރުފިޔާ ދޭން ބަޖެޓް ކޮމިޓީ އޮތީ ތައްޔާރަށް ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ، އެމްޑީޕީ މެންބަރު ޔައުގޫބް އަބްދުﷲ ވަނީ މަޖިލީހުގައި ވިދާޅުވެފައެވެ. ކޮންމެ ފްލެޓަކަށް 200،000 ރުފިޔާ ދޭން ބަޖެޓް ކޮމިޓީ އޮތީ ތައްޔާރަށް ކަމަށް ދާންދޫ ދާއިރާގެ، މެންބަރު ޔައުގޫބް ވިދާޅުވީ، ރައްޔިތުންގެ މަޖިލީހުގައި، އަންނަ އަހަރުގެ ބަޖެޓާ ގުޅޭ ގޮތުން ދެއްކެވި ވާހަކައިގައެވެ.
ރިޔާސީ އިންތިހާބުގެ ކެމްޕެއިންގައި، ހިޔާ ފްލެޓުތަކުގެ ފިނިޝިން ނިންމަން ކުރި ހަރަދުން 200000 ރުފިޔާ އަނބުރާ ދޭނެ ކަމަށް ޑރ. މުހައްމަދު މުއިއްޒުވަނީ ވިދާޅުވެފައެވެ.
ހިޔާ ފްލެޓުތަކުގެ ފިނިޝިން ނިންމަން ކުރި ހަރަދުން 200000 ރުފިޔާ އަނބުރާ ދޭނެ ކަމަށް ޑރ.މުހައްމަދު މުއިއްޒު ވިދާޅުވީ ކެމްޕެއިން ތެރޭގައެވެ. މުއިއްޒު ވިދާޅުވީ ހިޔާ ފުލެޓުތައް ބައެއް ފަރާތްތަކުން ވަރަށް އަގުބޮޑުކޮށް ހަދާފައިވާ ކަމަށެވެ. ނަމަވެސް ޖުމްލަކޮށް ހެދުމުން ފުލެޓެއް ހަދަން ދާނެ ކަމަށް ބެލެވެނީ 200000 ރުފިޔާ ކަމަށާއި އެ އަދަދު ދެއްވާނެ ކަމަށެވެ.
"އެވްރެޖް ގޮތެއްގައި އެ ދިޔަ ހަރަދަށް ބަލާފައި އާބަންކޯއިން އެ ކޯސްޓް އޮރިޖިނަލީ ޕްލޭން ކުރި ގޮތަށް، އެ ކޯސްޓް ބެއާކުރާ ގޮތަށް މި ކުރެވުނު ހަރަދު އެވްރެޖްކޮށްފައި އަނބުރާ ދައްކާގޮތަށް. އޭރު ޖެހުނު ހިސާބަށް ބަލާފައި ހަމަ އެ އަދަދަށް އެޗްޑީސީން ލޯނެއް ނަގާފައި ރައްޔިތުން އަތުން ދިޔަ އަދަދު އެވްރެޖް ކޮށްފައި ވަކި އަދަދެއް ކަނޑައަޅާފައި ދޭނަން،" މުއިއްޒު ވިދާޅުވިއެވެ.
