ކަސްޓަމްސްއިން ހިފެހެއްޓި ފައިސާގެ އަދަދު ހާމަކުރީ 2014 ވަނަ އަހަރު އަމަލުކުރަން ފެށި މަނީ ލޯންޑަރިން އަދި ޓެރަރިޒަމަށް ފަންޑްކުރުމުގެ ގާނޫނުގެ ދަށުން ވޭތުވެދިޔަ ހަ އަހަރު ދުވަހުގެ ތެރޭގައި ހިފެއްޓި ފައިސާގެ އަދަދު ހޯދުމަށް ރައްޔިތުންގެ މަޖިލިހުގެ މާފަންނު މެދު ދާއިރާގެ މެންބަރު އިބްރާހިމް ރަޝީދު ލިޔުމުން ފޮނުއްވި ސުވާލުތަކަށް ފޮނުވި ޖަވާބުގަ އެވެ.
މެންބަރު ރަޝީދުގެ ސުވާލުތަކަށް ރައީސް އިބްރާހިމް މުހައްމަދު ސޯލިހުގެ ސަރުކާރުގެ ޑިިފެންސް މިނިސްޓަރު މާރިޔާ އަހުމަދު ދީދީ ލިޔުމުން ފޮނުއްވި ޖަވާބުގައި ބުނެފައި ވަނީ 2015 ވަނަ އަހަރުން ފެށިގެން އެންމެ ގިނައިން ފައިސާ ހިފައްޓާފައި ވަނީ 2018 ވަނަ އަހަރުގައި ކަމަށެވެ.
ކަސްޓަމްސްއިން ހިފެހެއްޓި ފައިސާގެ ތަފްސީލް - ސީއެންއެމް ގްރެފިކްސް
ކޮންމެ އަހަރަކު ހިފެއްޓި ފައިސާގެ އަދަދާއި އެ ފައިސާ ނިސްބަތްވާ ކަރަންސީ ވަކިން އެނގޭ ގޮތަށް ކުރީގެ މިނިސްޓަރު މާރިޔާ ފޮނުއްވި ޖަވާބުން އެނގޭ ގޮތުގައި ހަ އަހަރު ދުވަހުގެ ތެރޭގައި ހިފެއްޓި ފައިސާގެ އަދަދު 31،772،807.56 ރުފިޔާއަށް އަރަ އެވެ.
މަޖިލިހަށް ފޮނުވި ޖަވާބުގައި ވަކި ކަރަންސީއެއް ހާމަނުކޮށް އެހެނިހެން ގޮތުގައި ހިއްސާކޮށްފައިވާ އަދަދުތައް - ސީއެންއެމް ގްރެފިކްސް
އެ ފައިސާގެ ތެރެއިން އެންމެ ގިނައިން ފައިސާ ހިފެއްޓި 2018 ވަނަ އަހަރު ކަސްޓަމްސްއިން ވަނީ 17.3 މިލިޔަން ރުފިޔާ ހިފަހައްޓާފަ އެވެ. ދެ ވަނައަށް އެންމެ ގިނަ ފައިސާ ހިފަހައްޓާފައިވާ ކަމަށް ތަފާސް ހިސާބުން ދައްކަނީ 2017 ވަނަ އަހަރު އެވެ. އެ އަހަރު 5.1 މިލިއަން ރުފިޔާ ހިފަހައްޓާފައިވެ އެވެ.
