މާލޭ މޭޔަރުކަމުގެ މަގާމު ހުސްވީ، އެ މަގާމުގައި ހުންނެވި ޑރ. މުހައްމަދު މުއިއްޒު، ރިޔާސީ އިންތިހާބު ކާމިޔާބު ކުރައްވައި، ރައީސުލްޖުމްހޫރިއްޔާކަމަށް އިންތިހާބުވުމުންނެވެ.
އަންނަ ޖެނުއަރީ މަހު މާލޭ މޭޔަރުގެ އިންތިހާބު އޮންނައިރު، އެ އިންތިހާބުގައި ރައީސް ޔާމީން ތާއީދު ކުރައްވަނީ ކުރީގެ ޕޮލިސް ކޮމިޝަނަރު ހުސެއިން ވަހީދަށްކަން އެމަނިކުފާނުގެ ފަރާތުން ހާމަކުރެއްވީ މިއަދު ޑރ. ޖަމީލެވެ.
މި އިންތިހާބުގައި ޕީއެންސީގެ ފަރާތުން ވާދަކުރައްވަނީ ކުރީގެ ބަންޑާރަ ނައިބު އާޒިމާ ޝަކޫރެވެ. ރިޕޯޓުތައް ބުނާގޮތުން ރައީސް ޑރ. މުއިއްޒުގެ ތާއީދު އޮތީ އާޒިމާއަށެވެ.
މޭޔަރު އިންތިހާބުގައި ކުރީގެ ރައީސް މުހައްމަދު ނަޝީދު ނިސްބަތްވާ ދަ ޑިމޮކްރެޓްސްއިން ވާދަކުރައްވަނީ މާލޭ ސިޓީ ކައުންސިލުގެ މެންބަރު މުހައްމަދު ސައިފް ފާތިހެވެ.
މާލޭ މޭޔަރުކަމަށް އެމްޑީޕީން ކުރިމަތިލާނެ ކެންޑިޑޭޓެއް ހޯދުމަށް އެ ޕާޓީގެ ޕްރައިމަރީއަށް ވަނީ ހުޅުވާލާފަ އެވެ.
