އެމްޑީޕީގެ ކުރީގެ ޗެއަޕާސަން ވެސް އަދާކުރައްވާފައިވާ ހަސަން ކާމިޔާބީ އިއުލާން ކުރެއްވީ، މީގެ ކުޑައިރުކޮޅެއް ކުރިން އޭނަ އެކްސްގައި ކުރެއްވި ޕޯސްޓެއްގަ އެވެ.
އެ ޕޯސްޓުގައި އޭނަ ލިއުއްވާފައިވަނީ، ވޯޓު ފޮށިތަކުގެ ނަތީޖާ ޝީޓުތަކުން ދައްކަނީ ބޮޑު ތަފާތަކުން އެ އިންތިހާބު އޭނާއަށް ކާމިޔާބު ވެއްޖެކަން ކަމަށެވެ.
ޑިމޮކްރެޓްސްގެ ބައެއް މެމްބަރުން އަންނަނީ އޭނާއަށް މަރުހަބާ ވެސް ކިޔަމުން ނެވެ. މިއަދު ހެނދުނު ފެށި ޑިމޮކްރެޓްސްގެ ފުރަތަމަ އެތެރޭގެ އިންތިހާބުގައި އެ ޕާޓީގެ ރައީސްކަމަށް ހަސަންގެ އިތުރުން ދެން ވާދަކުރެއްވީ އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމްރު އެވެ.
އަމްރު އަށް ތާއީދުކުރައްވާ އެ ޕާޓީގެ މެމްބަރުން އަންނަނީ އޭނާއަށް ވެސް މަރުހަބާ ކިޔަމުން ނެވެ. ނަމަވެސް އޭނާ ވިދާޅުވީ، އިންތިހާބުގެ ވަގުތީ ނަތީޖާ ނުލިބެނީސް ކާމިޔާބު އިއުލާން ނުކުރާނެ ކަމަށެވެ.
ޖުމްލަ 5835 މެމްބަރުންނަށް ވޯޓުލުމުގެ ހައްގު ލިބުނު މި އިންތިހާބުގެ ވޯޓުލުން ކުރިއަށް ގެންގޮސްފައިވަނީ ހެނދުނު 10:00 އިން މިއަދު ހަވީރު 4:00 އާ ހަމައަށެވެ. ވަގުތީ ނަތީޖާ އިއުލާން ކުރުން މާދަމާ އަށް ލަސްކޮށްފައިވާތީ ވެސް އެ ޕާޓީގެ ބައެއް މެމްބަރުން ދަނީ ހިތްހަމަ ނުޖެހުން ފާޅު ކުރަމުން ނެވެ.
