އަމްރު މިފަދައިން ވިދާޅުވެފައި ވަނީ އިއްޔެ އެ ޕާޓީން ބޭއްވި އިންތިހާބުގެ ވަގުތީ ނަތީޖާ އިއުލާން ކުރުން ލަސްކުރަމުން ދާތީ އެކަމާ ގުޅޭގޮތުން މިއަދު އެކްސްގައި ކުރެއްވި ޕޯސްޓެއްގަ އެވެ. އަމްރު ވިދާޅުވީ އިންތިހާބުތަކާ އަބަދުވެސް ކުރިމަތިލައްވަނީ އިންތިހާބުގައި މޮޅުވާ ފަރާތަކާއި ބަލިވާ ފަރާތެއް ވާނެކަން އެނގި ހުންނަވާ ކަމަށެވެ.
ފާއިތުވި 15 އަހަރަށްވުރެ ގިނަ ދުވަހު އޭނާ އާއެކު ސިޔާސީ މަސައްކަތް ކުރެއްވި ބޭފުޅުންނަށް އޭނާއަކީ ދޫދޭން ޖެހޭ ތަންތަނުގައި ބޮޑުކޮށް ދޫދޭ މީހެއްކަން އެނގިވަޑައިގަންނަވާނެކަން ފާހަގަކުރައްވާ އަމްރު ވިދާޅުވީ އޭނާއަކީ އަސާސްތަކުގައި ހިފަހައްޓާ މީހެއް ކަމަށެވެ.
އެމްޑީޕީގެ ޗެއާޕާސަން އިންތިހާބުގަ އާއި ޑިމޮކްރެޓްސްގެ ޕާޓީ ކެންޑިޑެންސީއަށް ވާދަނުކޮށް ފަހަތަށް ޖެހިވަޑައިވަޑައިގަތް ކަމަށް އަމްރު ވިދާޅުވި އެވެ. އަމްރު ވިދާޅުވި ގޮތުގައި އެކަން އެގޮތަށް ކުރެއްވެވީ ސިޔާސީ މަސައްކަތަކީ އޭނާ ލޯތްބާއި ގުރުބާނީ އާއެކު ކުރި މަސައްކަތެއް ކަމަށް ވާތީ ކަމުގަ އެވެ.
މި އިންތިހާބުގެ ނަތީޖާ އާ މެދު ހިތްހަމަނުޖެހުނަސް އިތުރަށް އެ ނަތީޖާ އާ މެދު އެއްޗެއް ދަންނަވަން ބޭނުން ނުވާކަން ފާހަގަކުރައްވާ އަމްރު ވަނީ އިންތިހާބުގައި ބުރަ މަސައްކަތް ކުރެއްވި ކެމްޕެއިން އަދި ސޯޝަލް މީޑިއާ ޓީމަށާއި އޭނާއަށް ވޯޓުދެއްވި ފަރާތްތަކަށް ޝުކުރުއަދާކުރައްވާފަ އެވެ.
