ދަ ޑިމޮކްރެޓްސްގެ ރައީސްކަމުގެ މަގާމަށް ހަސަން ލަތީފް ވަނީ ހޮވިވަޑައިގެންފައި ވަނީ މިދިޔަ ހޮނިހިރު ދުވަހު ބޭއްވި އެ ޕާޓީގެ ފުރަތަމަ ދައުރުގެ މަގާމުފުރާތަކަށް މެންބަރުން ހޮވުމުގެ އިންތިހާބުގަ އެވެ.
އެކަމާ ގުޅިގެން ހަސަން މިއަދު "ސީއެންއެމް" އަށް ވިދާޅުވީ ކެމްޕެއިން ތެރޭގައި ވައުދުވެވަޑައިގެންނެވި ކަންކަން އެގޮތުގެ މަތިން ކުރެވޭތޯ މަސައްކަތް ކުރައްވާނެ ކަމަށެވެ. އަދި ވައުދުވެވަޑައިގެންފައި ވާނީ ނުކުރެވޭ ކަންކަމަށް ނޫން ކަމަށާއި ޕާޓީގެ އަސާސީ ގަވާއިދުގެ ހަމަތަކާ އުސޫލުތަކާ އެއްގޮތަށް މަސައްކަތް ކުރައްވާނެ ކަމަށް އޭނާ ވަނީ ވިދާޅުވެފަ އެވެ.
ހަސަން ވިދާޅުވެފައި ވަނީ ޑިމޮކްރެޓްސްގެ މަގާމުތަކަށް ހޮވުނު ބޭފުޅުންނާ ގުޅިގެން އެއްބައިވަންތަކަމާ އެކު ޕާޓީ ހިންގުމުގެ މަސައްކަތް ކުރައްވާނެ ކަމަށެވެ. އެގޮތުން މަގާމުތަކަށް ހޮވުނު ފަރާތްތަކުގެ ތެރެއިން ނެޝަނަލް މަގާމުތަކަށް ހޮވުނު ފަރާތްތަކާ އެކު ބައްދަލުވެ، ވީ އެންމެ އަވަހަކަށް މަޝްވަރާތައް ކުރެއްވުމުގެ ވިސްނުން ގެންގުޅުއްވާ ކަމަށް ހަސަން ވިދާޅުވި އެވެ. އޭނާ ވިދާޅުވި ގޮތުގައި ހުރިހާ މަގާމަކަށް އިންތިހާބުވި ފަރާތްތަކާ އެކު ވެސް ބައްދަލުވުންތައް ބޭއްވުމަށް މަސައްކަތް ކުރައްވާނެ ކަމުގަ އެވެ.
މީގެ އިތުރުން ހަސަން ވިދާޅުވީ މިވަގުތު އެންމެ ބޮޑު އަމާޒަކީ ޑިމޮކްރެޓްސްއަށް ދިހަ ހާސް މެންބަރުން ހަމަކުރުމުގެ މަސައްކަތްކުރުން ކަމަށާއި ހުރިހާ ފަރާތްތަކުންވެސް އެކަން ހާސިލުކޮށްދިނުމަށް މަސައްކަތް ކުރުމަކީ އެ ޕާޓީ އަދި ޕާޓީ މެންބަރުންގެވެސް ވަރަށް ބޮޑު އެދުމެއް ކަމަށެވެ.
