ފެނަކައިން މުވައްޒަފުން ވަކިކުރާ ކަމަށް ފަތުރަމުންދާ ވާހަކަތަކާ ގުޅިގެން މިއަދު ނެރުނު ނޫސްބަޔާނެއްގައި ބުނީ އެ ކޯޕަރޭޝަނުން ގިނަ މުވައްޒަފުންތަކެއް ވަޒީފާއިން ވަކިކުރަމުންދާ ކަމަށް ބުނެ މީޑިއާގެ އެކި ވަސީލަތްތައް މެދުވެރިކޮށް އަދި އެހެނިހެން ގޮތްގޮތުން ފަތުރަމުންދާ ވާހަކަތަކަކީ ކަމުގެ ހަގީގަތް އޮޅުވާލައި، ނާޖާއިޒު މަގުސަދެއް ހާސިލު ކުރުމަށް، ރޭވުންތަކެއްގެ ތެރެއިން ހިންގާ ޒިންމާދާރުކަމެއް ނެތް މަސައްކަތްތަކެއްގެ ތެރެއިން އާންމު ކުރަމުންދާ ވާހަކަތަކެއް ކަމަށެވެ.
ބައެއް ރަށްރަށުގެ އިންޖީނުގެ އާއި އޮފީސް އިމާރާތްކުރުމަށް ފަށާފައިވާ މަޝްރޫއުތައް ނިމި، ބައެއް މަޝްރޫއުތަކަށް ބޭނުންވާ ތަކެތި ހުސްވެ ކުރެވޭނެ އެއްވެސް މަސައްކަތެއް ނެތް އިރު، އެ މަޝްރޫއުތަކަށް ކޮންޓްރެކްޓް އުސޫލުން ނަގާފައިވާ ވަގުތީ މުވައްޒަފުންގެ ކޮންޓްރެކްޓް މުއްދަތު، ރިޔާސީ އިންތިހާބާ ދިމާކޮށް އަދި އިންތިހާބުގެ ފަހުން މިދިޔަ މަހުގެ ނިޔަލަށް އިތުރުކޮށްފައިވާކަން ފާހަގަކުރެވިފައިވާ ކަމަށް ފެނަކައިން ބުނެ އެވެ.
ފެނަކައިން ބުނި ގޮތުގައި މިކަމަކީ އެ ކުންފުނިން ރައްޔިތުންނަށް ފޯރުކޮށްދޭ އަސާސީ ހިދުމަތްތައް ދެމެހެއްޓެނިވި ގޮތެއްގައި އިތުބާރާއި ޔަގީންކަމާ އެކު ފޯރުކޮށްދިނުމަށް ހުރަސް އެޅޭ ގޮތަށް ކޮށްފައިވާ ކަމަކަށް ވާތީ، ކުންފުނީގެ އަދުގެ މެނޭޖްމެންޓުން އަންނަނީ ކުންފުންޏާއި ކުންފުނިން ހިދުމަތް ފޯރުކޮށްދޭ އެންމެހާ ރައްޔިތުންގެ ހައްގުތައް ފުރިހަމައަށް ހިމާޔަތްކުރެވޭނެ މަގުން ކަންކަން އިންތިޒާމު ކުރުމުގެ މަސައްކަތް ކުރަމުން ކަމުގަ އެވެ. އެގޮތުން މަސައްކަތް ނިމިފައިވާ މަޝްރޫއުތަކަށް އަދި ފާއިތުވި ތިން މަސް ދުވަހު އެއްވެސް މަސައްކަތެއް ކުރިއަށް ގޮސްފައި ނުވާ، މިވަގުތަށް ކުރެވޭނެ އެއްވެސް މަސައްކަތެއް ނެތް މަޝްރޫއުތަކަށް ވަގުތީގޮތުން ކޮންޓްރެކްޓް އުސޫލުން ނަގައި، އާ ސަރުކާރަށާއި ކުންފުނީގެ އާ މެނޭޖްމެންޓަށް ބުރައަކަށްވާ ގޮތަށް މިދިޔަ ނޮވެމްބަރު މަހުގެ ނިޔަލަށް ކޮންޓްރެކްޓްތައް އާ ނުކުރަން ނިންމާފައިވާ ކަމަށް އެ ކޯޕަރޭޝަނުން ބުނެ އެވެ.
ފެނަކައިން ބުނީ ކުންފުނީގެ ޑިރެކްޓަރުންގެ ބޯޑުން ފާސްކޮށްފައިވާ މުވައްޒަފުންގެ އޮނިގަނޑުން ބޭރުންވެސް ގިނަ އަދަދެއްގެ މުވައްޒަފުން ނަގައި ދާއިމީކޮށްފައިވާއިރު، އެއްވެސް ދާއިމީ މުވައްޒަފަކު ވަޒީފާއިން ވަކިކުރުމަކީ އެ ކުންފުނީގެ އަދުގެ މެނޭޖްމެންޓުން ކުރާނެ ކަމެއް ނޫން ކަމަށެވެ. ކަމުގެ ހަގީގަތް ހާމަކުރުމެއްނެތި، އެ ކުންފުންޏާ މެދު ރައްޔިތުންގެ މެދުގައި ނުރަނގަޅު ތަސައްވަރެއް އުފެއްދުމަށް ކުރާ މަސައްކަތްތައް ވަގުތުން ހުއްޓާލުމަށް ފެނަކައިން ނެރުނު ބަޔާނުގައި ވަނީ ގޮވާލާފަ އެވެ.
ފެނަކައިން ބުނެފައި ވަނީ މިފަދަ ކަންކަމާ ކެރިގެން ކުރިމަތިލައި، ދެފުށް ފެންނަ ހަރުދަނާ ނިޒާމެއްގެ ތެރެއިން، ކުންފުނި މިހާރު ވެއްޓިފައިވާ މާލީ އަދި އިދާރީ އަނދަވަޅުން ސަލާމަތްކުރުމަށް ރައީސް ޑރ. މުހައްމަދު މުއިއްޒުގެ އިރުޝާދުފުޅުގެ ދަށުން އަދުގެ މެނޭޖްމެންޓުން ސާބިތުކަމާ އެކު މަސައްކަތްކޮށް، ނަތީޖާ ނެރެދޭނެކަމުގެ ޔަގީންކަން އެންމެހާ ދިވެހި ރައްޔިތުންނަށް ދޭ ކަމަށެވެ.
