ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ މީޑިއާ އޮފިޝަލް އަހުމަދު މުހައްމަދު (އޭޑީ) "ސީއެންއެމް" އަށް ވިދާޅުވީ ރޭގައި ބެހެއްޓިފައިވާ ޓްރާންސްފޯމަރަކީ މިހާރު އެތަނުގައި ހުރި ސަބްސްޓޭޝަނުގެ ބަދަލުގައި ބެހެއްޓިފައިވާ އެއްޗެއް ކަމަށެވެ. މީގެ އިތުރުން އަދި އެއް ޓްރާންސްފޯމަރު ބައިންދަން ޖެހޭ ކަމަށް ވެސް އޭނާ ވަނީ ވިދާޅުވެފަ އެވެ.
އަހުމަދު މުހައްމަދު ވިދާޅުވެފައި ވަނީ ޓާގެޓަކީ މި އަހަރު ނިމުމުގެ ކުރިން މާވެޔޮމަގުގައި ބެހެއްޓިފައިވާ ޓްރާންސްފޯމަރުތަކުގެ އިތުރުން ސަބްސްޓޭޝަންވެސް އެތަނުން ނަގައި މާވެޔޮމަގު އެއްކޮށް ހުޅުވާލުން ކަމަށެވެ.
ސްޓެލްކޯއިން ބުނި ގޮތުގައި މާވެޔޮ މިސްކިތް ސަރަހައްދުގައި ހުރި ސަބްސްޓޭޝަން އެ ތަނުގައި ބަހައްޓާފައި ހުންނަތާ ހަ އަހަރެއްހާ ދުވަސް ވެފައިވާ ކަމުގަ އެވެ.
ސްޓެލްކޯއިން ބުނީ މެނޭޖިން ޑިރެކްޓަރުގެ މަގާމާ ރަސްމީކޮށް ހަވާލުވެވަޑައިގެންނެވިތާ ގަޑިއެއްހާއިރުގެ ތެރޭގައި މިދިޔަ އަންގާރަ ދުވަހު ހުސައިން ފަހުމީ ވަނީ މާވެޔޮ މިސްކިތް ކައިރީގައި މަގުމައްޗަށް ވާގޮތަށް ބަހައްޓާފައިވާ އެ ކުންފުނީގެ ސަބްސްޓޭޝަން ހުންނަ ސަރަހައްދަށް ވަޑައިގެން އެތަން ބައްލަވާލައްވާފައި ކަމަށެވެ.
އެ ސަބްސްޓޭޝަނަކީ އެ ސަރަހައްދާއި އެމަގު ބޭނުން ކުރާ ރައްޔިތުންނަށް ތަކުލީފަކަށްވެފައިވާ ސަބްސްޓޭޝަނެއް ކަމަށާއި އެ ސަރަހައްދަށް ވަޑައިގެން ފަހުމީ ވަނީ އެ ސަބްސްޓޭޝަނާ ހެދިވަމުންދާ އުނދަގޫތަކަށް ރައްޔިތުންގެ ކިބައިން މާފަށް އެދިވަޑައިގެންފައި ކަމަށް ސްޓެލްކޯއިން ބުނެ އެވެ. އެ ކުންފުނިން ބުނެފައި ވަނީ އެ ސަބްސްޓޭޝަން ނެގުމުގެ އަމަލީ މަސައްކަތް ފައްޓަވައި، މި އަހަރު ނިމުމުގެ ކުރިން މަގުމަތިން އެ ސަބްސްޓޭޝަން ނަގާނެ ކަމަށް ފަހުމީ ވިދާޅުވެފައިވާ ކަމަށެވެ.
