މިނިސްޓަރު އިމްރާން މިފަދައިން ވިދާޅުވެފައިވަނީ ޝަހީދުންގެ ދުވަހުގެ މުނާސަބަތުގައި ދެއްވި ހިތާބެއްގައެވެ. އެގޮތުން މިނިސްޓަރު އިމްރާން ވިދާޅުވީ، ދިވެހިންނަކީ ކިތަންމެ ބައިމަދު ބައެއް ކަމުގައިވީނަމަވެސް ގައުމުގެ މިނވަންކަމާއި އަމިއްލަ ވެރިކަމާއި ރާއްޖޭގައި އޮތް ހަމަޖެހުމާއި ސުލްހަ މަސަލަސްކަމާއި އެކުވެރިކަމާއި އެއްބައެއްވަންތަކަމާއި އިސްލާމް ދީނުގެ މަތިވެރި ރިސާލަތުގެ މުހިންމުކަމަކީ ޝަހީދުންގެ ދުވަސް ދަސްކޮށްދޭ އެންމެ އަގުހުރި ފިލާވަޅުކަމަށެވެ.
މިނިސްޓަރު އިމްރާން ވިދާޅުވީ ޝަހީދު އަލި ރަސްގެފާނުގެ ޖިހާދުން އުނގަންނައިދޭ ފިލާވަޅަކީ ކިތަންމެ ބައިމަދުނަމަވެސް އަދި ތިމާ އެކަނި ހުންނަންޖެހުނު ކަމުގައިވިޔަސް ހައްގުގޮތުގައި ސާބިތުވެހުރި ތިމާގެ ވަތަނަށް ހިދުމަތްކުރުންމަތީ ދެމިހުންނަންޖެހޭނެކަން ކަމަށެވެ.
މީގެ އިތުރުން މިނިސްޓަރު އިމްރާން ވިދާޅުވީ ކޮވިޑް19ގެ ސަބަބުން ކުރިމަތިވެފައިވާ އާންމު ސިއްހަތުގެ ކުއްލި ނުރައްކަލުގެ ހާލަތުގައި ގައުމީ ޖިހާދުގައި އިސްސަފުގައި ތިބި ފަރާތްތަކުން ވަމުން އަންނަ ގުރުބާނީ އަށް ޝުކުރުހައްގު ކަމަށެވެ.
މުޅި އިންސާނިޔަތަށް ކުރިމަތިވެފައިވާ މި ނުރައްކާތެރި ބަލިމަޑުކަމާ ދެކޮޅަށް ދިވެހިރާއްޖެއިން ވެސް އުނދަގޫ ފިޔަވަޅުތަކެއް އަޅަން މަޖުބޫރުވެފައިވާކަން ފާހަގަކޮށް މިނިސްޓަރު އިމްރާން ވިދާޅުވީ އާންމު ސިއްހަތަށް ނުރައްކާވާ މިންވަރު ކުޑަކުރުމަށްޓަކައި އަޅާ ފިޔަވަޅުތަކާ ގުޅިގެން އިޤްތިސާދު ހީނަރުވެ އާންމު ދިރިއުޅުން މަޑުޖެހެމުންދާ ކަމަަށާއި، ކޮންމެ މީހަކުވެސް ގައުމީ ވާޖިބު އަދާކޮށް ފަރުދީ ޒންމާ ފުރިހަމަކުރަންޖެހޭކަމަށެވެ.
އަދި މިދަނޑިވަޅުގައި ކަމާއި ގުޅޭ ފަރާތްތަކުންދޭ އިރުޝާދުތަކަށް ފުރިހަމައަށް އަމަލުކުރުމަށް ވެސް މިނިސްޓަރު އިމްރާން ވަނީ އިލްތިމާސްކުރައްވާފައެވެ.
ކޮންމެ އަހަރެއްގެވެސް ޝައުބާން މަހުގެ ފުރަތަމަ ދުވަސް ފާހަގަކުރަމުން އަންނަނީ އިސްލާމްދީނާއި ދިވެހި ގައުމާއި ރައްޔިތުންގެ ދިފާއުގައި ޖިހާދުވެވަޑައިގެންނެވި އަލިރަސްގެފާނުގެ ގުރުބާނީގެ ހަނދާންތައް އާކުރާ ދުވަހުގެ ގޮތުގައެވެ. ކޮވިޑް19ގެ ސަބަބުން މިއަހަރު ބާއްވާ ޝަހީދުންގެ ދުވަހުގެ ރަސްމީޖަލްސާވެސް ނުބޭއްވުމަށް ހޯމް މިނިސްޓްރީންވެސް ވަނީ ނިންމާފައެވެ.
