އައްޑޫ ސިޓީގެ ގުޅިފައިވާ ރަށްތަކުން ފެނުގެ ހިދުމަތް މެދުކެނޑިފައިވާ މައްސަލަ އާ ގުޅޭގޮތުން ނިޒާރު "ސީއެންއެމް" އަށް ވިދާޅުވީ އެ ސިޓީގެ ރަށްތަކުން ސަޕްލައި ފެނުގެ ހިދުމަތް މެދުކެނޑިފައި ވަނީ އިއްޔެގެ މެންދުރުގެ ވަގުތެއްގައި ކަމަށެވެ.
ފެނުގެ ހިދުމަތް ކެނޑެން މެދުވެރިވީ ފެން އުފައްދާ ޕްލާންޓަށް ދިމާވި ޓެކްނިކަލް މައްސަލައެއްގެ ސަބަބުން ކަމަށް ނިޒާރު ވިދާޅުވި އެވެ. އޭނާ ވިދާޅުވެފައި ވަނީ މެޝިންތައް މަރާމާތު ކުރުމަށް ބޭނުންވާ ސްޕެއާ ޕާޓްސްތައް ގެންނަން ޖެހެނީ މާލޭން ކަމަށާއި ތަކެތި ގެނައުމުގެ މަސައްކަތް މިހާރު ކުރެވެމުން އަންނަ ކަމަށެވެ.
ޕްލާންޓަން ދިމާވި މައްސަލަ އާ ގުޅިގެން ހިތަދޫ، މަރަދޫ، މަރަދޫފޭދޫ އަދި ފޭދޫން ފެނުގެ ހިދުމަތް މެދުކެނޑިފައިވާއިރު، ފެން ގުޅޭނެ ވަކި ވަގުތެއް ބުނަން ދަތިކަމަށް އޭނާ ވިދާޅުވި އެވެ.
އައްޑޫ ސިޓީގައި ސަޕްލައި ފެނުގެ ހިދުމަތް ފޯރުކޮށްދެމުން އަންނަ ފެނަކަ ކޯޕަރޭޝަން ލިމިޓެޑް (ފެނަކަ) އިން މިއަދު ބުނި ގޮތުގައި ހިދުމަތް މެދުކެނޑެން މެދުވެރިވީ އާރުއޯ ޕްލާންޓުގެ ވީއެފްޑީ ޑްރައިވްއަށް ދިމާވި މައްސަލައެއްގެ ސަބަބުން ކަމަށެވެ.
ގުޅިފައިވާ ރަށްތަކުން ފެނުގެ ހިދުމަތް ކެނޑިފައިވުމުން މާފަށް އެދި އެ ކޯޕަރޭޝަނުން ބުނީ އުންމީދު ކުރަނީ މިއަދުގެ ވަގުތެއްގައި ހިދުމަތް އަލުން ފޯރުކޮށްދިނުމަށް ކަމަށެވެ.
