އެސްޕެކްސް ކަޒަކްސްތާން އިންޓަނޭޝަނަލް ސީރީސްގެ އަންހެން ސިންގަލްސްގައި ނަބީ ވަނީ ދެ ވަނަ ބުރުގައި ކުޅުނު މެޗުން ކަޒަކްސްތާންގެ ނާގިޒާ ރަހުމަތުލަޔޭވާ އަތުން ސީދާ ދެ ސެޓުން މޮޅުވެފަ އެވެ. ނަބީ ސެޓުތައް ގެންދިޔައީ 21-19، 21-14 އިންނެވެ. 

ކުއާޓާ ފައިނަލް މެޗުގައި ނަބީ ކުޅެން ޖެހޭނީ އުޒްބެކިސްތާންގެ ސޯފިޔާ ޒާހިރޯވާއާ އެވެ.

އަންހެން ސިންގަލްސްގެ ކުއާޓާ ފައިނަލުން ނަބާ ފުރުސަތު ހޯދާފައިވަނީ ދެ ވަނަ ބުރުގެ މެޗުން ޑިއާނާ ގަރަމޯވާއާ ބަލިކޮށްގެނެވެ. ނަބާ އެ މެޗުން މޮޅުވީ، 21-06، 21-04 އިން ސެޓުތައް ގެންގޮސްގެންނެވެ. 

ކުއާޓާ ފައިނަލުގައި ނަބާ ބައްދަލުކުރަން ޖެހެނީ ކަޒަކްސްތާންގެ ޖުމަދިލޯވާ ދިލްޔާރާއާ އެވެ.

ރޭންކިންގެ ގޮތުން ނަބާ އާއި ނަބީ ވެސް ކަޒަކްސްތާން މުބާރާތުގެ ސިންގަލްސް ބައިގައި ވާދަކުރަން ޖެހިފައިވަނީ ދެ ވަނަ ބުރުން ފެށިގެންނެވެ.